मेरो पहिलो प्राथमिकता उत्तर–दक्षिण जोड्ने तमोर करिडोर : योगेश भट्टराई
गृहजिल्लाबाट निर्वाचित हुँदा कस्तो अनुभव भएको छ ?
चुनाव जितेपछि खुसी त छँदै छु । जनताले विश्वास दिएका छन्, उत्तरदायी र जवाफदेही बनाएका छन् । यो जितले लोकतन्त्रप्रतिको उत्तरदायित्व र जवाफदेहिताको पुलका रूपमा काम गर्ने जिम्मेवारी बढाएको अनुभूत भइरहेको छ । उत्तरदायित्व र जवाफदेहिता कम हुँदा जनतामा लोकतन्त्रप्रति वितृष्णा पैदा भइरहेको थियो । त्यसैले जनताको मतको जवाफ दिन सक्ने जिम्मेवारी ग्रहण भएको महसुस भएको छ । जनताको असल सेवक कसरी बन्ने हो भन्ने विचारभाव सुरु भएको छ ।
जिल्लाको विकासका लागि के गर्नुहुन्छ ?
ताप्लेजुङसहित प्रदेश नम्बर १ कै समृद्धिको सम्भावना बोकेको उत्तर–दक्षिण जोड्ने तमोर करिडोर निर्माण मेरो पहिलो प्राथमिकता हुनेछ । तमोर जलाशययुक्त विद्युत् आयोजनाको काम अगाडि बढाउने, कञ्चनजंघा, पाथिभराजस्ता पर्यटकीय स्थलमा बढीभन्दा बढी पर्यटक भित्र्याउन हामी लाग्नेछौं । यसका साथै जिल्लाका सबै गाउँमा नियमित रूपमा सवारी साधन सञ्चालन हुने गरी सडक विस्तार, शिक्षा, स्वास्थ्यका साथै कृषिको आधुनिकीकरण अनि लगानीको वातावरण सिर्जना गर्ने, जिल्लामा लगानी भित्र्याउने विषय प्रमुख हुन् । लगानी भित्र्याएर स्थानीय तहमै रोजगारीका अवसर कसरी सिर्जना गर्न सकिन्छ । युवा शक्तिलाई जिल्लाभित्रै आयआर्जनका स्रोत कसरी दिलाउन सकिन्छ अनि समग्रमा पाँच वर्षभित्र ताप्लेजुङलाई कसरी गर्व गर्नलयाक बनाउन सकिन्छ भन्नेमा म केन्द्रित हुनेछु ।
अब केन्द्रीय संसद्मा तपाईंको भूमिका के हुनेछ ?
हामी अहिले इतिहासको गम्भीर मोडमा छौं । संविधान निर्माणदेखि लोकतन्त्रको पक्षमा सँगै लडेको कांग्रेस प्रतिपक्षमा बस्ने अवस्था छ । हामीलाई प्रतिपक्षको पीडा राम्ररी थाहा छ । एमालेसहितका वामपन्थी शत्ति पटक–पटक प्रतिपक्षमा बसेका छौं । यति कुरो प्रस्ट हो, प्रतिपक्षमा बस्ने अवस्थामा पुगेको कांग्रेसलाई हिजो हामीलाई दिएजति पीडा अवश्य दिनेछैनौं । यसको अर्थ उसले प्रतिपक्षमा बसेको अनुभूत गर्न पाउनेछैन । कांग्रेसभित्र शुद्धीकरणको आवश्यकता थियो, चुनावी परिणामले कांग्रेसलाई शुद्धीकरण थाल्न जनमत दिएको छ । कांग्रेसभित्रको शुद्धीकरणले एमालेलाई पनि आन्तरिक रूपान्तरणमा टेवा दिने विश्वास गर्न सकिन्छ । हामी पक्ष÷विपक्ष होइन, समृद्धिको अभियानमा हामी सारथिलाई सँगै लैजान्छौं । देशहितको मुद्दामा सहकार्य गर्नेछौं ।
मन्त्री पदमा तपाईंको पनि दाबी हो ?
मेरो त्यस्तो दाबी छैन । हामी पार्टीमा छलफल गरेर निर्णमा पुग्छौं । सरकार गठनको विषयमा कुरा भइरहेको छ । सरकार वाम गठबन्धनकै बन्छ । पार्टीले दिएको जुनसुकै जिम्मेवारी पनि म इमानदारीसाथ निर्वाह गर्न सक्छु ।
प्रस्तुति : सीताराम गुरागाईं