‘मधेसवादी दल सरकारमा जाने कुरा हल्ला मात्र’
राजविराज : राष्ट्रिय जनता पार्टी नेपालको अध्यक्षमण्डलका सदस्य राजेन्द्र महतोले तराई–मधेसकेन्द्रित दल वाम गठबन्धन नेतृत्वको सरकारमा सहभागी हुने कुरा हल्ला मात्र भएको बताएका छन् ।
मधेसी एसोसिएसन इन अमेरिका (मा)ले शनिबार राजविराजमा सहिदका परिवारको सम्मान तथा नवनिर्वाचितलाई शुभकामना र बधाई कार्यक्रममा नेता महतोले यस्तो बताएका हुन् । संविधान संशोधन नभएसम्म सरकारमा नजाने अडान सुनाउँदै उनले मधेसको जनादेशविपरीत कुनै सम्झौता नहुने स्पष्ट पारे ।
पहिलो प्राथमिकता नै संविधान संशोधन रहेको उल्लेख गर्दै उनले भने, ‘मधेसविरोधी संविधान नसच्याएसम्म सडक र सदनबाट संघर्ष जारी रहन्छ ।’ धनुषाबाट प्रतिनिधिसभा सदस्यमा निर्वाचित महतोले मधेसको जनादेशअनुसार संविधान संशोधन नभएसम्म संघर्ष जारी रहने दोहोर्याए ।
मधेस आन्दोलनमा ज्यान गुमाएकाका परिवारलाई महतो र आयोजक संस्थाका महासचिव संगीत रौनियारले दोसल्ला ओढाई सम्मान गरेका थिए । ०७३ फागुन २३ गतेको मलेठ घटनामा मारिएका सन्जन मेहता, वीरेन्द्र मेहता, पीताम्बर मण्डल, आनन्दकुमार साह, इन्द्र भनिने इनरदेव यादव अनि ०७२ मंसिर ६ गते ज्यान गुमाएका दिलीपकुमार साहको परिवारलाई सहयोगस्वरूप एक÷एक लाख रुपैयाँ उपलब्ध गराइएको थियो । कार्यक्रममा राजपाबाट प्रतिनिधिसभा, प्रदेशसभा र स्थानीय तहमा निर्वाचित जनप्रतिनिधि पनि सम्मानित भएका थिए ।
प्रतिक्रिया दिनुहोस !
