किशुनजीको जयन्तीमा ओलीको बोली : चुनाव जितेकोमा दम्भ छैन

काठमाडौं : सन्दर्भ थियो, कांग्रेस  संस्थापक नेता कृष्णप्रसाद भट्टराईको ९४ औं जन्मजयन्ती । तर, एमाले अध्यक्ष केपी ओली अधिकांश वक्ताको केन्द्रीय विषय बन्न पुगे । शनिबार ललितपुरको बाँडेगाउँमा आयोजित कार्यक्रममा भावी प्रधानमन्त्रीका रुपमा हेरिएका ओलीलाई लक्ष्य गर्दै कांग्रेस नेताहरुले गरेका टिप्पणीले सबैको ध्यान खिच्यो ।

नेता प्रदीप गिरि र प्रकाशमान सिंहले अब ओलीको काँधमा गम्भीर जिम्मेवारी आएको भन्दै आउँदा दिनमा दलहरूबीचका कटुता भुलेर देशलाई समृद्धिको बाटोमा हिँडाउन सुझावसमेत दिए । गिरिले विश्वको हरेक मुलुकमा सविधान कार्यान्वयनको बेला एउटा-एउटा साहसिक नेता उदाएको उदाहरण दिँदै उनले ओली त्यस्तै भूमिकामा देखा परेको बताए । ओलीलाई सन्त नेता कृष्णप्रसाद भटराईसँग तुलना गर्दै मितव्ययी र स्वार्थरहित काम गर्न गिरिले सुझाव दिए । उनले सफल प्रधानमन्त्रीका लागि प्रतिपक्षी दलका नेताहरूसँग राम्रो सम्बन्ध बनाउनु अत्यावश्यक हुने बताए ।

लगत्तै बोलेका ओलीले निर्वाचनको जित-हारले आफूमा कुनै दम्भ नपलाएको बताए । आफू साधारण किसानको छोरो भएकाले कुनै दम्भ नभएको उनको भनाइ थियो । ‘म कुनै खान्दानी कुलिन परिवारको छोरो होइन, जसको धाक देखाउँदै दम्भ गरुँ', उनले भने । कांग्रेस नेता गिरिले सुझाएका वाक्यांशप्रति टिप्पणी गर्दै उनले जालझेल र बेइमान गरेर राजनीतिमा जे पनि हुन्छ भन्ने थिति बसाउन नचाहेको प्रस्ट्याए । बाँचुञ्जेल इमान्दारीसाथ काम गर्ने प्रतिबद्धतासमेत उनले जनाए ।

गिरिले सुझाएका वाक्यांशहरूलाई ‘सफ्ट वार्न' को संज्ञा दिएका उनले आफू सीमित उमेर, सीमित ज्ञान र सीमित सामथ्र्य भएको व्यक्ति भएकाले सक्नेजति काम जालझेल र बेइमान नगरी गर्ने बताए । धेरैले वाम गठबन्धनको विजयपछि मुलुक स्थिरता र समृद्धिको मुद्दामा अघि बढेको बताइरहँदा ओलीले भने मुलुक समृद्धिमा अघि बढ्यो भनेर दाबी गरेनन् । ‘हामी स्थिरता र समृद्धिको बाटोमा अघि बढ्दै छौं भनेर म अहिले नै ठ्याक्कै दाबी गर्न सक्दिनँ', उनले भने, ‘तर अब त्यो बाटोमा अघि बढ्नुको विकल्प छैन ।'

कार्यक्रममा ओलीसँगै कांग्रेस नेताहरू गिरि र सिंहले जनआन्दोलन ०४६ पछिका पहिलो प्रधानमन्त्री भट्टराईको शालिन र मितव्ययी व्यक्तित्वको चर्चा गरेका थिए । प्रधानमन्त्रीबाट बिदा भएपछि सरकारी निवासबाट एउटा सुटकेस, छाता र सुराही लिएर निस्किएका भट्टराई अहिलेको सन्दर्भमा भनी उत्तिकै उदाहरणीय रहेको उनीहरूले बताए ।

भट्टराईले जीवनको अन्तिम समय बाँडेगाउँस्थित आ श्रममा बिताएका थिए । पाँच रोपनी क्षेत्रफलमा रहेको यो आ श्रमलाई थप व्यवस्थित गर्न आयोजकले एमाले नेता ओलीसँग आग्रहसमेत गरे ।