ईपीएल क्रिकेट : ललितपुर र पोखरा इलिमिनेटरमा
काठमाडौं : ज्ञानेन्द्र मल्लको कप्तानीमा रहेको ललितपुर प्याट्रियट्स र शक्ति गौचनको कप्तानीमा रहेको पोखरा राइनोजबीच ईपीएल क्रिकेटको इलिमिनेटरमा प्रतिस्पर्धा हुने भएको छ । मंगलबार भएको लिग चरणको अन्तिम खेलमा पोखरामाथि ६ विकेटको जित हात पार्दै ललितपुरले इलिमिनेटरमा स्थान बनाएको हो । पराजयका बीच पाँच खेलबाट चार अंक बटुलेको पोखराले पनि अंककै आधारमा अन्तिम चारमा स्थान सुरक्षित गर्न सफल भयो । इलिमिनेटर खेल बुधबार नै हुनेछ ।
इलिमिनेटरको विजयी टोलीले भैरहवा ग्लाडिएटर्स र विराटनगर वारियर्सबीचको पराजित टोलीसँग दोस्रो क्वालिफायरमा प्रतिस्पर्धा गर्नेछ । दोस्रो क्वालिफायरमा विजयी टोलीले भने उपाधिका लागि पहिलो क्वालिफायरको विजेतासँग प्रतिस्पर्धा गर्नेछ । ललितपुरले पोखरालाई अन्तिम बलमा पराजित गरेसँगै काठमाडौं किङ्स इलाभेनको प्ले अफ खेल्ने झिनो गणितीय सम्भावना समाप्त भएको छ ।
त्रिवि क्रिकेट मैदानमा टस हारी पहिले ब्याटिङ गरेको पोखराले प्रारम्भिक ब्याट्सम्यान सुनिल धमलाको उत्कृष्ट ब्याटिङमा २० ओभरमा पाँच विकेट गुमाउँदै एक सय ३२ रन बनायो । ललितपुरले अन्तिम बलमा चार विकेट गुमाउँदै लक्ष्य भेट्टायो । ललितपुरलाई जितका लागि अन्तिम एक बलमा एक रन आवश्यक रहँदा कप्तान ज्ञानेन्द्रले चौका प्रहार गर्दै टोलीको जित सुनिश्चित गरे । टोलीको जितमा ज्ञानेन्द्रले १७ बलमा अविजित २७ रनको योगदान गरे ।
सुरुआती ब्याट्सम्यान जयकिसन कोल्सावालाले पनि ४५ बलमा ५६ रनको योगदान गरे । ज्ञानेन्द्रले एक छक्का र एक चौका प्रहार गरे । कोल्सावालाले तीन छक्का र चार चौका हिर्काए । अर्का ओपनर ब्याट्सम्यान शंकर रानाले पनि ३५ रन जोडे । त्यसअघि पोखराका लागि प्रारम्भिक ब्याट्सम्यान सुनिलले ६२ बलमा अविजित ७० रन बनाएका थिए । उनले पाँच छक्का र दुई चौका प्रहार गरेका थिए । राजेश पुलामी मगरले ३२ र विनोद भण्डारीले १२ रन बनाए । अन्य ब्याट्सम्यानले भने गतिलो प्रदर्शन गर्न सकेनन्।
ललितपुरका बलर रसिद खान, दीपेश भण्डारी, ललितनारायण राजवंशी र सन्दीप लामिछानेले एक÷एक विकेट लिए । पोखराका लागि पाकिस्तानी खेलाडी इस्राउल्लाहले दुई विकेट लिए भने कप्तान शक्ति र सुसन भारीले एक÷एक विकेट हात पारे । पोखराका कप्तान शक्तिले राम्रो प्रदर्शन गरे पनि पराजित हुनु परेको प्रतिक्रिया दिए । ‘आजको खेलमा राम्रो प्रदर्शन गरेका हौं । एक सय ३२ रनको योगफल हामीले रक्षा गर्न सक्नुपर्ने हो’, शक्तिले भने, ‘यद्यपि विपक्षीले पनि राम्रो प्रदर्शन गरे । भोलि फेरि यही टोलीसँग खेल्दैछौं । जितको अवसर फेरि पनि हुनेछ ।’
इलिमिनेटरमा पुग्दा खुसी छु
ज्ञानेन्द्र मल्ल, कप्तान, ललितपुर प्याट्रियट्स
आजको खेलमा हामीले राम्रोसँग लक्ष्य पछ्यायौं । जितका लागि सबै खेलाडीले निकै मेहनत गरे । अघिल्ला केही खेलमा जितको निकै नजिक पुगेर पनि हामीले नतिजा गुमाउनु परेको थियो । त्यसैले पनि यो सफलताबाट निकै खुसी लागेको छ । अझै प्रतिस्पर्धा बाँकी छ । अझ मुस्किल प्रतिस्पर्धा हुनेछन् । त्यसमा पनि जित हात पारेर उपाधिका लागि अघि बढ्ने प्रयासमा रहनेछौं ।
प्रतिक्रिया दिनुहोस !
