बम्बोजकलीसँग केही लागेन चञ्चलकलीको

सौराहा : बम्बोजकलीले चितवनमा मंगलबारदेखि सुरु भएको हात्ती महोत्सवअन्तर्गत हात्ती दौडको उपाधि जितेको छ । ऐरा होटलको तर्फबाट सहभागी बम्बोजकलीले निर्धारित दूरी ३५ सेकेन्डमा पूरा गर्दै उपाधि जितेको हो । फाइनलमा बम्बोजकलीले सस्तो फर्निचरबाट प्रतिनिधित्व गरेको चञ्चलकलीलाई केही सेकेन्डले मात्र पछि पारेको थियो । पाँच हात्ती सहभागी उक्त स्पर्धामा बुद्ध एअरको एकताकली तेस्रो भयो ।

१४औं हात्ती महोत्सवको उद्घाटन प्रधानमन्त्री शेरबहादुर देउवाले गरे । हात्ती महोत्सवअन्र्तगत बुधबार हात्तीको मैत्रीपूर्ण फुटबल हुनेछ । मंगलबार नै मैत्रीपूर्ण हात्तीपोलो खेलाइएको थियो । हात्तीको फुटबलमा चारवटा समूह सहभागी छन्— प्रभु बैंक, कुमारी बैंक, सीजी फुड्स र मेगा बैंक । यस्तै दर्शकको रोजाइमा परेको हात्तीपोलोमा ६ वटा टिमबीच प्रतिस्पर्धा हुनेछ ।

पोलोमा नाटा, म्याक्स प्लाई, एभेरेस्ट ग्रुप, आईएमई इन्सुरेन्स, एनआईसी एसिया बैंक, मेगा बैंक प्रतिस्पर्धामा छन् । हात्तीको वनभोज र हात्ती सुन्दरी, हात्ती रंगाउने प्रतियोगिता महोत्सवको आकर्षण रहेको महोत्सवका संयोजक दीपक भट्टराईले बताए । महोत्सव पाँच दिनसम्म चल्नेछ । पर्यटकीय आकर्षणका लागि हरेक वर्ष सौराहामा हात्ती महोत्सव हँुदै आएको छ ।

यसपटकबाट महोत्सवलाई हात्तीमैत्री बनाइएको आयोजकले जनाएको छ । गत वर्षसम्म हुँदै आएको डुंगा, टाँगा, गाडा दौड स्थगित गरिएको छ । महोत्सवमा करिब एक सय हात्ती प्रयोग हुनेछन् । वन्यजन्तु संरक्षणसहित मानव र वन्यजन्तुबीचको द्वन्द्व अन्त गर्न महोत्सव सफल भएको क्षेत्रीय होटल संघका अध्यक्ष सुमन घिमिरेले बताए ।