भोजपुर : नेकपा (एमाले) पोलिटब्युरो सदस्य एवं पूर्व सूचना तथा सञ्चारमन्त्री शेरधन राईले प्रदेश –१ को मुख्यमन्त्रीका लागि आफू सक्षम रहेको बताएका छन् ।
जिल्लाको पौवादुङ्गा गाउँपालिकाको वार्षिक बजेट र कार्यक्रम घोषणासभामा उनले प्रदेश –१ को सरकारको नेतृत्वका लागि आफू सक्षम रहेको बताएका हुन् ।
भोजपुर –२ खबाट प्रदेशसभा सदस्यमा निर्वाचित राईलेभने, ‘प्रदेश सरकारको नेतृत्वको दौडमा म बलियोरुपमा प्रस्तुत छु, सम्भवत मुख्यमन्त्रीको जिम्मेवारी मेरो काँधमा आउनेछ ।’
उक्त प्रदेशको मुख्यमन्त्रीका लागि एमालेका सचिव एवं पूर्व संस्कृतिमन्त्री भीमप्रसाद आचार्यले पनि आफ्नो दाबी प्रस्तुत गर्दै आएका छन् ।
नेता राईले आउँदो फागुन पहिलो साताभित्र केन्द्र र प्रदेश सरकार बनिसक्ने र नयाँ सरकार बनेपछि मुलुकमा समृद्धिको महाअभियान सरु हुने बताउँदै अब नेपाल कुनै अलमल र अराजकतामा नफस्ने दावी गरे ।
विकास निर्माणका काममा स्थानीय सरकारलाई जवाफदेही बनाउन सहयोगर्ने उनले बताए । स्थानीय सरकारलाई थप बजेट र कार्यक्रम दिन आगामी प्रदेश सरकार तयार हुने पनि उनको भनाइ छ ।
नेकपा (माओवादी केन्द्र) बाट नवनिर्वाचत प्रतिनिधिसभा सदस्य सुदन किराँतीले प्रदेश –१ ले राईलाई मुख्यमन्त्रीका रुपमा पाउने आशा व्यक्त गर्दै विकास निर्माणका काममा नयाँ सरकारपछि तिब्रता आउने स्पष्ट पारे ।
गाउँपालिकाको प्रथम गाउँसभाले खानेपानी, सडक, विद्युत्, कृषि, पर्यटन, सञ्चार, खेलकुद, स्वास्थ्य, शान्तिसुरक्षा र शिक्षालगायतका कार्यक्रम र चालू पूँजीका लागि कुल रु २२ करोड २९ लाख ८१ हजारको बजेट पारित गरेको थियो ।
गाउँपालिकाका अध्यक्ष किरण राईले जनताको चाहनाअनुसार आफूहरुले ल्याएका कार्यक्रम कार्यान्वयनका लागि केन्द्र र प्रदेश सरकारको सहयोग आवश्यक भएको बताए । गाउँपालिकाका उपाध्यक्ष सम्झना राईले वार्षिक बजेट र कार्यक्रम सार्वजनिक गरेकि थिइन् । रासस
प्रतिक्रिया दिनुहोस !
