भृकुटीमण्डपमा अत्याधुनिक ब्लड बैंक

भक्तपुर : नेपाल रेडक्रस सोसाइटीका अध्यक्ष सञ्जीव थापाले काठमाडौंको भृकुटीभण्डपमा अत्याधुनिक ब्लड बैंक निर्माण गरिने बताएका छन् । नेपाल रेडक्रस सोसाइटी बालकोट उपशाखाको १८ औं साधारणसभा तथा बहुउद्देश्यीय भवन शनिबार उद्घाटन गर्दै थापाले भृकुटीभण्डपस्थित रक्तसञ्चार केन्द्रमा विश्व स्वास्थ्य संगठनको मापदण्डअनुसार अत्याधुनिक ब्लड बैंक निर्माण गरिने जानकारी दिएका हुन् ।

रेडक्रसले विपद्को क्रममा खोज तथा उद्धार, राहत र पुनर्लाभसँगै ९० प्रकृतिका सेवा देशभर प्रवाह गरिहेको उनको भनाइ थियो । ‘रेडक्रसले विपद्को क्रममा खोज तथा उद्धार, राहत र पुनर्लाभ वितरणसँगै ९० प्रकृतिका सेवा देशभर प्रवाह गर्दै आएको छ’, अध्यक्ष थापाले भने, ‘रेडक्रस आफ्नो दायित्व र जिम्मेवारीबाट कहिल्यै विचलित हुनेछैन । नेपाल रेडक्रस देशभरका एक हजार पाँच सय उपशाखाको साथमा खरो उत्रँदै आएको छ ।’
उनले रेडक्रसले सात हजार भूकम्प पीडितहरुको निजी घर निर्माण गरिरहेको समेत बताए ।

‘भूकम्पले भत्काएका सयौं स्वास्थ्य चौकी र विद्यालयसमेत निर्माण गरिरहेका छौं’, अध्यक्ष थापाले भने, ‘भक्तपुरमै चिनियाँ रेडक्रसको सहयोगमा देशकै ठूलो राहत सामग्रीको गोदामघर निर्माण गर्दैछौं ।’ उनले देशका प्रमुख रणनीतिक क्षेत्रहरुमध्ये पूर्वको इटहरी र मध्य पश्चिमको साँफेबगरमा पनि गैरखाद्य राहत सामग्रीको गोदामघर निर्माण गर्ने प्रक्रिया अघि बढिरहेको सुनाए ।

उक्त अवसरमा अध्यक्ष थापाले एक करोड पाँच लाख रुपैयाँ लागतमा निर्माण सम्पन्न भएको बालकोट उपशाखाको बहुउद्देश्यीय भवनको उद्घाटसमेत गरेका थिए । त्यस्तै उपशाखाद्वारा प्रकाशित स्मारिका विमोचन गर्दै अध्यक्ष थापाले बहुउद्देश्यीय भवन निर्माण गर्न २५ हजारभन्दा बढी सहयोग गर्ने दाताहरुलाई प्रशंसापत्र वितरण गरेका थिए ।
त्यस्तै नेपाल रेडक्रस सोसाइटी भक्तपुर जिल्ला शाखाका सभापति मनोजकुमार थापाले उपशाखाहरुको संस्थागत विकासको लागि जिल्ला शाखाले आफ्नै भवन बनाउने उपशाखालाई दुई लाख र एम्बुलेन्स सञ्चालन गर्ने उपशाखालाई एक लाख पचास हजार रुपैयाँ आर्थिक सहयोग गर्दै आएको जानकारी दिए ।

कार्यक्रममा रेडक्रसका यशस्कर सदस्य राजु खड्काले बालकोट उपशाखाले निरन्तर रुपमा सञ्चालन गर्ने प्रतिबद्धता जनाए आफ्ना दिवंगत पिता डम्बरबहादुर खड्का स्मृति प्रतिष्ठानको तर्फबाट एम्बुलेन्स हस्तान्तरण गर्न तयार रहेको घोषणा गरेका थिए ।

२०६५ साल चैत २१ गते जग शिलान्यास गरिएको उक्त बहुउद्देश्यीय भवन दुई वर्षअघि नै निर्माण सम्पन्न भएको बालकोट उपशाखाका सभापति चन्द्रकृष्ण श्रेष्ठले जानकारी दिए । धेरैजसो सामुदायिक भवनहरु शिलान्यास भए पनि निर्माण सम्पन्न हुँदैनन् तर बालकोट रेडक्रसको भवन निर्माण पूरा गर्ने लक्ष्यभन्दा अघि नै पूरा भएको उपशाखाका संस्थापक सभापति उद्धव सिलवालले बताए ।

पाँचतले उक्त भवनका तीन तला भाडामा दिइएको छ । जसबाट वार्षिक करिब पाँच लाख ७८ हजार रुपैयाँ आम्दानी हुँदै आएको छ ।