बूढासुब्बा गोल्डकपः संकटासँग बदला लिँदै पुलिस फाइनलमा

धरानः नेपाल पुलिस क्लब धरानमा जारी २० औँ अन्तराष्ट्रिय आमन्त्रण बूढासुब्बा रेडबुल गोल्डकप फुटबल प्रतियोगिताको फाइनलमा प्रवेश गरेको छ ।

बुधवार धरान रंगशालामा भएको पहिलो सेमिफाइनल खेलमा साविक उपविजेता संकटा क्लबलाई २–१ गोलले पराजित गर्दै पुलिसले फाइनल यात्रा तय गरेको हो ।

यो जितसँगै पुलिसले संकटासँग तीन महिना अगाडि चन्द्रगिरी गोल्डकपमा भोगेका हारको बदला समेत लिएको छ । उपाधिका लागि शनिवार पुलिसले थ्रीस्टार र भारतको दुर्गापुर स्टिल क्लबको विजेतासँग खेल्ने छ ।

पहिलो हाफ गोलरहित बराबरी खेलको पुलिसले ५४औँ मिनेटमा गोल गर्दै १–० को अग्रता बनायो । पुलिसका रेजिन सुब्बाले संकटाका रक्षापक्तिका खेलाडीलाई छक्याउँदै प्रहार गरेको बलले जाली चुमेको थियो ।

१–० ले पछि परेको संकटा पुलिसविरुद्ध आक्रमक बन्दै ६४औं मिनेटमा गोल गर्दै खेललाई १–१ को बराबरीमा ल्याउन सफल भयो । संकटाका केड्रिक अब्बाले दिएको क्रस पासलाई सदुपयोग गर्दै प्रकास बुढाथोकीले गरेको सशक्त प्रहार गोलमा परिणत भयो ।

निर्धारित समयमा १–१ को बराबरी खेलेको पुलिसले अतिरिक्त समयमा संकटालाई पराजित गर्दै फाइनल यात्रा तय गरेको छ । १०४औं मिनेटमा बुद्ध लामाले हेड गोल गर्दै पुलिसलाई फाइनल प्रवेश गराए । बुद्धले रेजिन सुब्बाको फ्री किक बललाई हेडबाट गोलमा परिणत गरे ।