तीन औषधि पसलमा ताला
नेपालगन्ज : औषधि व्यवस्था विभाग शाखा कार्यालय नेपालगन्जले तीनवटा औषधी पसलमा तालाबन्दी गरेको छ । विभागले मापदण्ड विपरित औषधी बिक्री गरेको आरोपमा पहिलो कारवाही स्वरुप केही समयका लागि औषधि पसलमा तालाबन्दी गरेको हो ।
पटक पटक सुधारका लागि अनुरोध गर्दा पनि अटेर गरेपछि पहिलो कारबाही स्वरुप औषधि पसल बन्द गरिएको विभाग नेपालगन्जका प्रमुख निनु श्रेष्ठले बताइन् । ‘हामीले उहाँहरुलाई पटक–पटक सम्बन्धित व्यक्ति औषधि विक्री वितरणमा बसाल्न भन्थ्यौं तर त्यसो नगरेको पाइयो’ उनले भनिन्, ‘अनुमगनका क्रममा मापदण्ड विपरित सञ्चालनमा आएका र नेपालमा प्रतिवन्धित औषधिहरु बिक्री वितरण भइरहेको पाइएपछि चेतावनी स्वरुप केही पसलमा तालाबन्दी गरेका हौं ।’
औषधी विभाग नेपालगन्ज कार्यालयका कर्मचारी र सरोकारवालाहरुको टोलीले अनुगमनका क्रममा राँझा, नेपालगन्ज मेडिकल कलेज र भेरी अञ्चल अस्पताल अगाडी सञ्चालनमा रहेका औषधि पसलमा शीलबन्दी गरेको हो । नेपालगञ्ज मेडिकल कलेज अगाडि सञ्चालनमा रहेको दर्शन मेडिकल २१ दिन, राझा चौकमा सञ्चालनमा रहेको पवन मेडिकल १५ दिन र भेरी अञ्चल अस्पताल अगाडी सञ्चालनमा रहेको हेल्थ स्टार फार्मेसी ३० दिनका लागि बन्द गरिएको छ ।
प्रतिक्रिया दिनुहोस !
