चिनी उद्योग बन्द भएपछि किसान मर्कामा
परासी : पश्चिम नवलपरासीको सबैभन्दा ठूलो लुम्बिनी चिनी उद्योग बन्द भएपछि स्थानीय किसान मर्कामा परेका छन् । उद्योगका प्रमुख सञ्चालक मनिष अग्रवालको निधन भएसँगै उद्योग बन्द भएपछि यस क्षेत्रका किसानलाई उखु विक्री गर्न समस्या भएको हो ।
अग्रवालको नाउँमा रहेको उद्योगको आर्थिकदेखि सबै कारोबार उनकै नाउँबाट सञ्चालन भएका कारण समस्या आएकाले उद्योग बन्द गर्नुपरेको महाप्रबन्धक बाबुलाल अग्रवालले बताए ।
‘उखु खरिद गरेका किसानलाई तत्काल भुक्तानी दिनुपर्छ । ठूलो उद्योग भएकाले त्यसको स्वामित्व हकवालाको नाउँमा ल्याउन समय लाग्ने भएकाले यसवर्षलाई उद्योग बन्द गरिएको हो ।’ अग्रवालले भने । उद्योगलाई छिटो सञ्चालनमा ल्याउन परिवारका सदस्यहरु कानुनी प्रकृयामा लागि रहेको अग्रवालले बताए । उद्योग बन्द भएपछि परासी क्षेत्रको सुनवल, रामग्राम नगरपालिका, पाल्ही नन्दन, सरावल गाउँपालिकाकाका किसानहरु मर्कामा परेका छन् । हाल यस क्षेत्रका किसानहरु इन्दिरा र बाग्मती चिनी उद्योगमा उखु विक्रीगर्दै आएका छन् ।
उद्योगले यसवर्ष २ लाख क्विण्टल बढी उखु क्रसिङ्ग गरेको छ । उखु खरिद गरेका मध्ये ८० प्रतिशत किसानको रकम भुक्तानी गरिसकेको उद्योगले जनाएको छ । महाप्रबन्धक अग्रवालले भुक्तानी गर्न बाँकी रहेका किसानको रकम उद्योग नयाँ स्वामित्वमा आएपछि तत्काल उपलव्ध गराइने बताए ।
उद्योगपति अग्रवालको माघ ६ गते दिल्लीस्थित मेदान्त अस्पतालमा ब्लड क्यान्सरका कारण निधन भएको हो ।