सरकारको नेतृत्व ओली र प्रचण्डले आलोपालो गर्ने एमाले उपाध्यक्ष रावलको संकेत

काठमाडौं : एमाले उपाध्यक्ष भीम रावलले अब बन्ने सरकारको नेतृत्व एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ले आलोपालो गर्ने सहमति भएको बताए । 

काठमाडौंमा भएको एक साक्षात्कारमा बोल्दै उपाध्यक्ष रावलले ओली–प्रचण्ड बीचको वान–टु–वान भेटवार्तामा आलोपालो नेतृत्वमा सरकार चलाउन सकिनेबारे समझदारी कायम भएको संकेत गरेका हुन् ।

उनले भने,‘असोज १७ गते वाम गठबन्धन घोषणा गरेकै दिन हामीले ७ बुँदे सहमति बाहिर ल्याएका थियौं, त्यो सहमतिमा पनि नेतृत्व आलोपालो चलाउने अन्तरनिहित आसय थियो।’उनले ओली र प्रचण्ड बीचको निर्णायक वार्तामा निर्वाचन आयोगले सम्पूर्ण मत परिणाम सार्वजनिक गरेपछि वाम गठबन्धनकै संयुक्त रुपमा सरकार बनाउनेबारे सहमति भएको सुनाए ।

नेता रावलले संयुक्त सरकार सञ्चालनकै अवस्थामा पार्टी एकता प्रक्रियालाई पनि निरन्तरता दिनेबारे आजको भेटवार्तामा छलफल भएको विश्वास दिलाए । उनले एक हप्ताभित्रै एमाले अध्यक्ष ओलीको नेतृत्वमा नयाँ सरकार गठन हुने स्पष्ट पारे । रावलले भने,‘अबको प्रधानमन्त्री ओली नै बन्नुहुन्छ, यो पनि भन्ने विषय हो र ? जनताले त्यही भन्छन्, जनमतले त्यही भनेको छ, पत्रपत्रिकाले त्यही भनेको छ, देश र जनताले भनिसक्यो त ?’

उनले एकताका पाँच चरणका प्रक्रिया पूरा भैसकेको बताए । उनले भने,‘अहिलेसम्म हामीले एकताबारे पाँच चरणमा छलफल गरिसकेका छौं, अब नेतृत्व र नीतिमा गहन ढंगले छलफल चलिरहेको छ।’ रावलले राष्ट्रपति, उपराष्ट्रपति लगायत महत्वपूर्ण पदमा सहमतिकै आधारमा जिम्मेवारी दिने जानकारी दिए । उनले थपे,‘यो भागबण्डा गर्ने कुरा होइन, नेताहरुलाई जिम्मेवारी दिने कुरा हो।’ उनले प्रधानमन्त्री शेरबहादुर देउवा नेतृत्वको काम चलाउ सरकारले गरेका निर्णय पुनरावलोकन गर्ने बताए ।

उनले प्रदेश सभाका प्रमुखबारे पनि त्यसको औचित्यका आधारमा पूनरावलोकन गरिने स्पष्ट पारे । उनले ‘प्रदेशको राजधानी त प्रदेश सभाले तोक्ने हो, हामीले भन्ने कुरा हुँदैन्।’ रावलले सरकारले भुकम्प पीडितको लागि एक लाख थप्ने निर्णय पनि गलत ढंगले गरेको आरोप लगाए । उनले वाम गठबन्धनको मुख्य उद्देश्य भनेको मुलुक र जनताको समृद्धि भएको बताए ।