होलीमा मदिरा पिएर मोटरसाइकल चलाउने दुई जनाको मृत्यु

जनकपुरधाम : होलीको खुशीमा मदिरा पिएर केदाएको मोटरसाइकल दुर्घटना हुँदा दुई जनाको मृत्यु भएको छ । होलीको मौकामा मदिरा पिएर तिव्र गतिमा मोटरसाइकल चलाउने क्रममा विपरित दिसातर्फबाट आउँदै गरेको गाडीमा ठोएिकर पूर्व पश्चिम राजमार्ग अन्तर्गत जनकपुरको मुजेलियामा दुर्घटना हुँदा दुई जनाको मृत्यु भएको हो ।

दुर्घटनामा जनकपुर उपमहानगरपालिका १४ निवासी २८ वर्षीय प्रविण राउत र वडा नम्बर १९ का २२ वर्षीय कृष्ण साहको मृत्यु भएको हो । राउतले चलाएको अनटेस्ट मोटरसाइकल र साहले चलाएको ज ९ प४४८५ नम्बरको मोटरसाइकल विपरित दिसाबाट आउँदै गर्दा एकआपसमा ठोक्किएका थिए । राउतको घटनास्थलमै मृत्यु भएको थियो भने साहको जनकपुर अंचल अस्पतालमा उपचारका क्रममा मृत्यु भएको हो ।

मृतक दुवै युवकले मदिरा पिएको धनुषाका प्रहरी उपरीक्षक प्रविण धितालले बताए । होलीको क्रममा मदिरा पिएर तिव्र गतिमा मोटरसाइकल चलाउने, उच्छृखल क्रियाकलाप गर्ने, एउटै बाइकमा तीनजना बस्ने, हेल्मेटबिना चलाउने दर्जनबढी युवालाई प्रहरीले नियन्त्रणमा लिएको छ ।

त्यसैगरी ति युवाहरुबाट ३० वटा जति मोटरसाइकल पनि नियन्त्रणमा लिएको छ । धितालले भने, ‘नियन्त्रणमा लिइएका युवाहरुलाई अपराधको अवस्था हेरी कार्वाहीको प्रक्रिया अघि बढाइने छ ।’