एमाले-माओवादी संसदीय दलको संयुक्त बैठक
काठमाडौँ: पार्टी एकता प्रक्रियामा रहेका वाम गठबन्धन नेकपा एमाले र नेकपा माओवादी केन्द्रको संसदीय दलको संयुक्त बैठक नयाँ बानेश्वरस्थित संसद् भवनमा बसेको छ ।
प्रधानमन्त्री केपी शर्मा ओलीले आइतबार संघीय संसद्को प्रतिनिधिसभामा विश्वासको मत लिनुअघि गठबन्धनका दुवै दलले आफ्नो संसदीय दलको संयुक्त बैठक बसेको हो ।
संसदीय दलको संयुक्त बैठकलाई प्रधानमन्त्री एवम एमाले अध्यक्ष ओली र माओवादी केन्द्रका अध्यक्ष पुष्पकमल दाहाल ‘प्रचण्ड' र एमालेका वरिष्ठ नेता झलनाथ खनालसहितले सम्बोधन गरेका छन् ।
पार्टी एकता गर्ने घोषणा गरेका दुवै दलले संयुक्त संसदीय दलको बैठक अभ्यास गर्दै आएका छन् । संयुक्त बैठकपछि प्रधानमन्त्रीले आइतवार अपरान्ह ४ बजे विश्वासको मत लिने कार्यक्रम छ ।
प्रधानमन्त्रीको विश्वासको मतदानमा आफ्ना सबै सांसदलाई सरकारको पक्षमा मतदान गर्न बैठकमा नेताहरुले आग्रह गरेका छन् ।
विश्वासको मतदानमा मधेस केन्द्रित दल पनि प्रधानमन्त्री ओलीको पक्षमा उभिने बताइएको छ । त्यसका लागि राजपाले प्रधानमन्त्री ओलीको पक्षमा सहयोग गर्ने बताइसकेको छ । संघीय समाजवादी फोरमले सरकारमा जाने निर्णय नै गरिसकेको छ।