घोडाघोडी नगरपालिकाका मेयरमाथि गोली हानियो
कैलालीः घोडाघोडी नगरपालिकाका मेयर ममताप्रसाद चौधरीमाथि उनको घरैमा गोलीहानिएको छ । सोमबार साँझ आएको करिब १० जनाको समूहमध्ये एकले मेयर चौधरीमाथि गोली प्रहार गरेको हो ।
त्यही समूहमा रहेका अर्का व्यक्तिले चौधरीको टाउकोमा खुकुरी समेत प्रहार गरेका छन् । सुख्खडस्थित घरैमा आक्रमणबाट घाइते भएका चौधरीलाई अहिले घोडाघोडी अस्पताल सुख्खडमा भर्ना गरिएको छ ।
उनको अवस्था गम्भीर रहेको जिल्ला प्रहरी कार्यालय कैलालीका प्रमुख एसपी विनोद घिमिरेले जानकारी दिए । घिमिरेका अनुसार चौधरीको पेट र कम्मर आसपासमा छर्रा लागेको छ ।
केही दिनअघि घोडाघोडी–५ की राधा चौधरीमाथि बोक्सी आरोपमा कुटपिट हुदा पीडकहरुलाई संरक्षण दिएको आरोप चौधरीमाथि लागेको थियो । त्यही घटनालाई लिएर चौधरीमाथि गोली हानिएको हुन सक्ने प्रहरीको अनुमान छ ।
प्रतिक्रिया दिनुहोस !
