व्यवसायीमाथि गोली प्रहारको विरोधमा भैरहवा बजार बन्द

भैरहवा : भैरहवामा व्यवसायीलाई लक्षित गरी गोली प्रहार गरेको र प्रहरीले उल्टो पीडितलाई केरकार गरेर दुःख दिएको विरोधमा भैरहवा बजार बन्द गरिएको छ।सिद्धार्थ उद्योग वाणिज्य संघ रुपन्देहीका सदस्य हरिश सेठियामाथि भएको गोली प्रहार र प्रहरीले पीडितलाई थप दुःख दिएको तथा शहरमा चोरी डकैती बढेको भन्दै संघले मंगलबार भैरहवा बजार बन्दको आह्वान गरेको छ ।

गएराति सिद्धार्थ उद्योग वाणिज्य संघका सदस्य हरिश सेठियामाथि गोली प्रहार भएको थियो । तर, गोली नलागेको कारण उनी जोगिएका थिए ।विद्युतीय व्यवसायी सेठिया सोमबार राति आफ्नो प्रतिष्ठान बन्द गरेर घर जाने क्रममा भारतीय नम्बरको मोटरसाइकलमा आएका दुईजना व्यक्तिले उनीमाथि गोली प्रहार गरेका थिए ।

गोली प्रहार गरेर भाग्ने क्रममा स्थानीयले ‘सुटर' लाई नियन्त्रणमा लिएर प्रहरीलाई बुझाएका छन् । गोली प्रहार गरेर भाग्ने क्रममा नल कटुवा पेस्तोलसहित भारतको महाराजगंज जिल्ला थाना कोतवाली मोनजोत ग्राम पंचायत नौतनवाका ४६ वर्षीय रमजान मुसलमान पक्राउ परेको प्रहरीले जनाएको छ । घटनामा प्रयोग गरिएको यूपी ५६ ई ४१४९ नम्बर प्लेट डिस्कभर मोटरसाइल समेत प्रहरीले नियन्त्रणमा लिएको छ ।

साथै उनको साथबाट नलकटुवामा लोड भई फायर भएको अवस्थामा खोका एक थान र गोली एक थान बरामद भएको छ । मोटरसाइकल चालक भने फरार रहेका छन् । उनी पनि भारतीय नागरिक रहेको बताइएको छ । तर, व्यवसायीले भने घटनाका दोषीलाई अनुसन्धानको दायरामा ल्याएर कारबाही गर्नुको साटो प्रहरीले उल्टो पीडितलाई अन्याए हुने काम गरेको आरोप लगाउँदै बजार बन्द गरेका हुन् ।

व्यवसायीहरुले बजार बन्द गरी जिल्ला प्रशासन कार्यालय र जिल्ला प्रहरी कार्यालयमा कारवाहीको माग गर्दै ज्ञापन पत्र बुझाएका छन् । ज्ञापन पत्र बुझ्दै रुपन्देहीका प्रमुख जिल्ला अधिकारी हरिप्रसाद मैनालीले घटना दुःखद् भएको भन्दै प्रहरीलाई अनुसन्धानमा सहयोग गर्न आग्रह गरे । उनले बजार बन्द गरेर समस्याको समाधान नहुने भन्दै बन्द नगर्न व्यवसायीलाई आग्रह गरे ।

भैरहवाको मुख्य बजार क्षेत्रमा संङसाँझै व्यवसायी माथि भएको यस प्रकारको जघन्य अपराधले हामी उद्योगी व्यवसायीलाई मात्र नभई सम्पूर्ण नगरवासीमा भय, र त्रास सृजना भएको छ संघले बुझाएको ज्ञापन पत्रमा उल्लख गरिएको छ विगतमा केही दिन देखि नगर क्षेत्रमा आम नागरिकको घरमा चोरीको घटना समेत बढ्दै गएको देखिएपनि सुरक्षा निकायबाट यस विषयमा कुनै संवेदनशिलताको आभाष आम नागरिकले गर्न नसकेको व्यहोरा अवगत गराउँछौँ । साथै संघले घटनाको छानबिन गरी दोषीमाथि कारवाहीको माग गरेको छ ।