मेयरमाथि आक्रमण गर्ने चार सार्वजनिक

कैलाली : घोडाघोडी नगरपालिकाका मेयर ममताप्रसाद चौधरीमाथि भएको सांघातिक आक्रमणमा संलग्न भएको आरोपमा प्रहरीले विप्लव नेतृत्वको नेपाल कम्युनिष्ट पार्टीका चार कार्यकर्ता सार्वजनिक गरेको छ ।

जिल्ला प्रहरी कार्यालय कैलालीमा बिहीबार बिहान पत्रकार सम्मेलनको आयोजना गर्दै प्रहरीले घोडाघोडी नगरपालिका १ लक्ष्मीपुरका ४० वर्षीय कमल क्षेत्री, सोही ठाउँका भरतबहादुर शाह, धनगढी उपमहानगरपालिका ८ का पूर्णप्रसाद खनाल, र टीकापुर नगरपालिका १ का हृदयराज बोगटीलाई सार्वजनिक गरेको हो ।

कमल क्षेत्री विप्लव नेतृत्वको नेपाल कम्युनिष्ट पार्टीका राष्टिय युवा जनसेवक संगठन कैलाली अध्यक्ष हुन् । त्यस्तै भरतबहादुर शाह घोडाघोडी नगर सचिव तथा पार्टीका जिल्ला कमिटि सदस्य हुन् । पूर्णप्रसाद खनाल विप्लव माओवादीका धनगढी इञ्चार्ज हुन् भने हृदयराज बोगटी टीकापुर नगर सचिव हुन् ।

उनीहरु मेयर चौधरीमाथि भएको आक्रमणका बेला उनको घर बाहिर रहेको समुहमा संलग्न भएको कैलालीका प्रहरी उपरीक्षक विनोद घिमिरेले बताए । यी चारसहित १३ जना विरुद्ध किटानी जाहेरी परेकाले उनीहरु विरुद्ध ज्यान मार्ने उद्योगमा कैलाली जिल्ला अदालतमा मुद्धा दर्ता गरिएको चौधरीको भनाइ छ ।

प्रहरीले अन्य नौ जनाको खोजी भइरहेको पनि जनाएको छ । मेयर चौधरीको काठमाडौं त्रिवि शिक्षण अस्पतालमा उपचार भइरहेको र अवस्था खतरामुक्त रहेको बताइएको छ । मेयर चौधरीको कम्बरमा गोली लागेको छ भने टाउकोमा पनि घाउ भएकाले उक्त घाउ ठीक भएपछि मात्रै कम्बरको गोली निकालिने बताइएको छ ।

प्रहरीले यसअघि पनि विप्लव नेतृत्वको माओवादीले मेयर चौधरीसँग चन्दा माग गरेको, धम्क्याउने गरेको र प्रेस विज्ञप्ती प्रकाशित गर्दै जनकारबाहीको चेतावनी दिँदै आएको जनाइएको छ । चौधरी माथि जनकारबाही गर्नका लागि विप्लव माओवादीले घटना भएको दिन निकालेको विज्ञप्ती पछि प्रहरीले मेयर चौधरीलाई सुरक्षा थ्रेट बढेको बताएको थियो ।

उनी काठमाडौं गएको भनेपछि प्रहरी फर्किएको उपरीक्षक घिमिरेले बताए ।