ट्रिपरको ठक्करले मोटरसाइकल चालकको मृत्यु
सिरहा : पूर्वपश्चिम राजमार्ग अन्तर्गत सिरहाको पुरानो चोहर्वामा ट्रिपरको ठक्करले बिहीबार बिहान मोटरसाइकल चालकको मृत्यु भएको छ । मोटरसाइकलको पछाडी सवार अर्का युवक घाइते भएका छन् ।
स. १ प. १७१ नम्बरको ट्रिपरको ठक्करबाट मोटरसाइकल चालक मिर्चैया ७ का २५ वर्षीय रामप्रसाद यादवको घटनास्थलमै मृत्यु भएको इलाका प्रहरी कार्यालय मिर्चैयाका प्रहरी नायव उपरीक्षक गज्जुसिद्धी बज्राचार्यले बताए । मोटरसाइकलको पछाडी सवार सोही ठाउँका उदयचन्द्र यादव गम्भीर घाइते भएका हुन् ।
घाइते यादवको उपचार मिर्चैयास्थित मंगलम् अस्पतालमा सम्भव नभएपछि थप उपचारका लागि काठमाडौं लगिएको छ । उनको खुटा फ्याक्चर भएको र टाउकोमा समेत चोट लागेकाले सास फेर्न गाह्रो भएको आफन्तले बताए । ठक्कर दिने ट्रिपर प्रहरीले नियन्त्रणमा लिएको छ भने चालक फरार छन् ।
दुर्घटनाको विरोधमा मृतकका आफन्त र स्थानीयले करिब एक घण्टा राजमार्ग अवरुद्ध गरेका थिए । उनीहरुले बा. ४ ख. ६६८८ र बा. ४ ख. ८२० नम्बरको माइक्रो लगायतका सवारी साधनमा तोडफोड समेत गरेका छन् । उनीहरुले ट्राफिक प्रहरी विरुद्ध नाराबाजी समेत गरेका थिए । राजमार्ग अवरुद्ध भएपछि सयौं गाडी अलपत्र परेका थिए ।
प्रहरी नायव उपरीक्षक बज्राचार्यले बजार क्षेत्रमा ट्राफिक ड्युटी खटाउने र दुर्घटना न्यूनिकरण गर्ने अभियानमा लाग्ने सम्झौता पश्चात अवरुद्ध राजमार्ग केहिबेरमै संचालनमा आएको बताए ।
प्रतिक्रिया दिनुहोस !
