थ्रीस्टार उपाधि नजिक
बुटवल : बलियो प्रतिस्पर्धी मनाङ मर्स्याङदी क्लबलाई पाखा लगाउँदैै थ्रीस्टार क्लब तिलोत्तमा गोल्डकप फुटबलको उपाधि नजिक पुगेको छ । बिहीबार बुटवलमा भएको अन्तिम सेमिफाइनल खेलमा मनाङलाई २-१ गोलले पाखा लगाउँदैै थ्रीस्टार उपाधि नजिक पुगेको हो । उपाधिका लागि थ्रीस्टारले नेपाल पुलिससँग प्रतिस्पर्धा गर्नेछ ।
देवीनगरस्थित एन्फा टेक्निकल सेन्टरको मैदानमा भएको खेलको पहिलो हाफको २३औं मिनेटमा विदेशी खेलाडी फोलोरेङ्कको गोलसँगै पाएको अग्रता कायम गर्न नसक्दा मनाङ फाइनल पुग्नबाट वञ्चित भयो । फोलोरेङकले विशाल राईको पासलाई हेडमार्फत जाली चुमाएका थिए ।
तर मनाङको अग्रता एक मिनेट पनि टिक्न सकेन । थ्रीस्टारका बुद्ध चेम्जोङले बललाई जाली चुमाउँदै खेललाई बराबरीमा ल्याएका थिए । मनाङका गोलरक्षक विशाल श्रेष्ठलाई बिट गर्दै चेम्जोङले आकर्षक गोल गरेका थिए ।
पहिलो हाफको ३९औैं मिनेटमा कप्तान नीराजन खड्काको गोलसँगै थ्रीस्टारले २-१ को अग्रता बनाएको थियो । खड्काकै गोल निर्णायक बनेपछि थ्रीस्टार फाइनलमा पुगेको हो । खड्काले रेजिन धिमालको क्रसलाई हेडमार्फत पोस्टको दिशा दिएका थिए ।
खेलको दोस्रो हाफमा दुवै टोलीले पाएका सुनौलो मौका गुमाएका थिए । खेलको अन्तिम समयमा मनाङका विमल बस्नेतले डीबक्समा पाएको सुनौलो अवसर गुमाएका थिए । मनाङका अञ्जन विष्ट घाइते भएर मैदानबाट बाहिरिएपछि मनाङको फाइनल पुग्ने आशा समाप्त भएको हो ।
मनाङका प्रशिक्षक विनोद महर्जनले खेलाडीले पाएका अवसर गुमाउँदा हार्नु परेको बताए ।
थ्रीस्टारका प्रशिक्षक मेघराज केसी भने खेलाडीको प्रदर्शनमा सन्तुष्ट देखिए । उनले फाइनलमा अझै सशक्त प्रदर्शन गर्ने बताए ।
बिहीबारको खेलमा थ्रीस्टारका बुद्ध चेम्जोङ म्यान अफ दी म्याच बने । प्रतियोगिताको फाइनल खेल शनिबार हुनेछ ।
थ्रीस्टारसँग उपाधिका लागि प्रतिस्पर्धा गर्न लागेको पुलिसले आयोजक रूपन्देही-११ लाई सडेन डेथमा हराउँदै फाइनलमा स्थान बनाएको हो ।
रूपन्देही फुटबल संघको आयोजनामा जारी प्रतियोगिताको विजेताले नगद सात लाख ७७ हजार सात सय ७७ तथा उपविजेताले चार लाख ४४ हजार चार सय ४४ रुपैयाँ प्राप्त गर्नेछन् ।
प्रतिक्रिया दिनुहोस !
