अतिक्रमण रोक्दा कुटपिट

गाईघाट : सार्वजनिक जग्गा अतिक्रमण रोक्न खोज्दा बिहीबार ७० वर्षीय वृद्धासहित एकै परिवारका तीन जनामाथि कुटपिट भएको छ ।

त्रियुगा नगरपालिकाको पोर्ताहा झोरा टोल चोकमा रहेको जग्गामा स्थानीय पुल्कित चौधरीले अतिक्रमण गरी घर बनाउन खोज्दा स्थानीयले रोकेका थिए । स्थानीयको अगुवाइ गर्दै घर निर्माण गर्न नदिएको भन्दै पुल्कितका भाइ शिवनारायण र बहिनी मौसम चौधरीले ७० वर्षीय सुखरी चौधरी, उनका छोरीहरू सन्सारी र सरस्वती चौधरीलाई कुटपिट गरेका हुन् ।

घरमा बसिरहेका उनीहरूलाई शिवनारायणले दिउँसो ४ बजे मरणासन्न हुने गरी कुटपिट गरेको उदयपुरका एसपी नवराज भट्टले जानकारी दिए । वृद्ध सुखरीको टाउको र उनका छोरीहरूको शरीरका विभिन्न भागमा चोट लागेको जनाइएको छ । उनीहरूको जिल्ला अस्पतालमा उपचार भइरहेको छ । घटनामा संलग्न अभियुक्तलाई पक्राउ गरी अनुसन्धान सुरु गरिएको प्रहरीले जनाएको छ ।

जिल्ला प्रहरी कार्यालयमा पटक–पटक छलफल भई सार्वजनिक जग्गा अतिक्रमण गरी घर नबनाउने सहमति भएको स्थानीय दुर्गानन्द चौधरीले बताए । प्रहरीले पनि अतिक्रमित जग्गा सार्वजनिक भएको भन्दै घर नबनाउन निर्देशन दिएको उनको भनाइ छ । जग्गा संरक्षणका लागि वकालत गर्दा शिवनारायण समूहले आफूलाई मार्ने धम्की दिएको उनले बताए ।