ट्यांकर मजदुरको आन्दोलन स्थगित, शनिबारबाट तेल आयत सहज हुने

बिर्तामोड : आयल निगमले ‘लकिङ सिस्टम’ कार्यान्वयनमा ल्याउने निर्णय गरेसँगै आन्दोलन थालेका ट्यांकर मजदुरले आन्दोलन स्थगित गरेका छन् । यससँगै शनिबारदेखि पूर्वी नाकाबाट तेल आयात सहज हुने भएको छ ।

जिल्ला प्रशासन कार्यालयमा शुक्रबार भएको सर्वपक्षीय बैठकपछि ढुवानी मजदुरले आन्दोलन स्थगित गरेका हुन् । पेट्रोलियम ढुवानी मजदुरको आन्दोलनका कारण झापासहित पूर्वी जिल्लामा पेट्रोलियम पदार्थको अभाव सुरु भएको थियो ।

जिल्ला प्रशासन कार्यालय झापामा शुक्रबार आयल निगमका कर्मचारी, ट्यांकर मजदुर संघका पदाधिकारी, डिलर्स एसोसिएसनका पदाधिकारी र प्रमुख जिल्ला अधिकारीसहितको वार्तापछि ट्यांकर मजदुरहरु आन्दोलन स्थगित गर्न सहमत भएका हुन् ।

मजदुर संघले निगमलाई बुझाएको १५ बुँदे माग सबैभन्दा पहिला सुनुवाइ हुनुपर्ने अडान राखेका थिए । वार्तामा सात सदस्य रहेको तलब भत्ता समायोजन समिति समेत गठन गरिएको छ ।

डिलर्स एसोसिएसन मेचीका वरिष्ठ उपाध्यक्ष नविन कोइरालाको संयोजकत्वमा मजदुर, आयल निगमका कर्मचारी र डिलर्स पदाधिकारी सम्मिलित समिति गठन गरिएको छ ।

समितिले मजदुरका माग सम्बन्धमा केन्द्रमा जानकारी गराएर कार्यान्वयनका लागि पहल गर्ने सहमति भएको ट्यांकर इकाइ कार्यालय चारआलीका अध्यक्ष तोकप्रसाद दुलालले बताए ।

आन्दोलन स्थगित भएसँगै सिलिगुडी डिपोबाट झापासहित पूर्वका चार जिल्लामा शनिबारदेखी पेट्रोलियम पदार्थ ढुवानी हुने भएको छ ।