डडेल्धुरा : अख्तियार दुरुपयोग अनुसन्धान आयोगले मुद्दा लगाए पछि रोकिएको काठ विक्री चालु आर्थिक वर्षदेखि व्यवसायिक प्रयोजनका लागि काट्ने र विक्री गर्ने तयारी भइरहेको छ ।
जिल्ला वन कार्यालय डडेल्धुराले मुद्दा नलागेका सामुदायिक वनबाट आन्तरिक खपतका लागि कटानी आदेश दिन थालेपछि सो क्षेत्रका दर्जनौ सामुदायिक वनले काठ काट्ने तयारी गरेका छन् ।
आवादी र राष्ट्रिय वन क्षेत्रबाट पनि व्यवसायिक प्रयोजनका लागि काठ काट्ने र विक्री गर्ने तयारी भइरहेको छ । सामुदायिक वनले उपभोक्ताको आन्तरिक खपतका लागि काठ काट्न अनुमति मागिरहेको भएपनि भित्रभित्रै काठ व्यवसायीले विक्री गर्ने गरि काम अघि बढाएको उपभोक्ता बताउँछन् ।
‘आन्तरिक खपतका लागि रुख काट्ने अनुमति मागेर व्यवसायिक प्रयोजनका लागि काठ बिक्री गर्ने परम्परा नै हो ।’ स्थानीय विरेन्द्र भण्डारीले भने, ‘सामुदायिक वन क्षेत्रमा मात्रै नभई आवादी क्षेत्र र राष्ट्रिय वनबाट काठ काट्ने उदेश्यले स्थानीय काठ व्यवसायी केहि दिन यता निकै सक्रिय हुन थालेका छन् ।’
जिल्ला वन कार्यालयले केहि सामुदायिक वनबाट आन्तरिक खपतका लागि ढलापडा र सुख्खा काठ संकलनका लागि अनुमति दिन थालिएको जनाएको छ ।
भित्री मधेसको जोगबुडास्थित सेक्टर वन कार्यालयका सहायक वन अधिकृत चिरञ्जीवी थापाले केहि सामुदायिक वनमा आन्तरिक खपतका लागि काठ काट्न थालिएको बताए ।
भित्री मधेससहित जिल्लाका एक सय आठ सामुदायिक वनमा अनियमित ढंगले रुख काटिएको र ४३ करोड बढि भ्रष्टाचार भएको भन्दै अख्तियार दुरुपयोग अनुसन्धान आयोगले आठ वर्ष पहिले दायर गरेको मुद्दा हाल सर्वोच्चमा विचाराधिन छ ।
जिल्ला वन कार्यालयले त्यतिबेला काटिएका झण्डै १० लाख क्युविक फिट काठ अझै व्यवस्थापन गर्न सकेको छैन ।
प्रतिक्रिया दिनुहोस !
