काठमाडौं : चलचित्र भैरेको अर्को गीत ‘सनम माया लाको’ मंगलबार सार्वजनिक भएको छ । उक्त गीतमा एभरेस्ट सूर्य बोहराको शब्द तथा यम बरालको संगीत रहेको छ । गीतमा यम बराल र अञ्जु पन्तले स्वर दिएका छन् । गीतको छायांकन अपर मुस्ताङ र त्यस छेउछाउमा गरिएको हो । पुरुषोत्तम प्रधानको छायांकन र वसन्त श्रेष्ठको नृत्य निर्देशन रहेको गीतमा कलाकार दयाहाङ राई र सुरक्षा पन्तको अभिनय रहेको छ ।
योभन्दा अगाडि भैरेको ‘सान्नानीलाई भेट्न आउँदा’ बोलको गीत सार्वजनिक भइसकेको छ । कार्यक्रममा फिल्मका निर्देशक बोहराले बोल्नेभन्दा पनि काम गरेरै देखाएको बताए । ‘मेहेनत गरेका छौं, आशा छ सबैले मन पराउनुहुनेछ’, उनले भने । गीतमा मौलिक भेषभूषा भएको पनि उनले बताए ।
फिल्मका नायक दयाहाङ राईले अभिनयभन्दा पनि गीतमा नाच्न गाह्रो हुने अनुभव सुनाए । ‘गीतको छायांकन अपर मुस्ताङमा गर्ने भनेपछि म लोभिएँ तर लेक लाग्यो, सुटिङ गर्न गाह्रो भयो’, उनले भने । गीतको सुटिङ गर्न चार दिन लागेको उनले जानकारी दिए ।
नायिका सुरक्षा पन्तले दयाहाङसँग नाच्न पाउनु आफ्ना लागि ठूलो सौभाग्य भएको बताइन् । ‘मैले पहिलोपटक नाचेको छु, नाच्दा धेरै टेक खानु प¥यो, जे होस् डान्सभन्दा पनि केमेस्ट्री देखाउन मेहनत गरेका छौं’, उनले बताइन् ।
गीतका संगीतकार तथा गायक बरालले धेरै समयको अन्तरालपछि एभरेस्ट सूर्य बोहरासँग काम गर्न पाएकोमा खुसी व्यक्त गरे । ‘भैरेमा पुरानो साथीसँग काम गर्न पाउँदा सपना साकार भएको छ’, उनले भने । मैले यो गीत आफ्ना अग्रजको अनुभव सँगालेर बनाएको छु’, उनले भने । भैरेको टिमबाट आफूलाई हटाइएको खबर सत्य नभएको पनि उनले स्पष्ट पारे ।
भैरे फिल्मका निर्देशक बोहरा हुन् भने निर्माता प्रेमप्रसाद पौडेल र देवीमाया अधिकारी हुन् । कार्यकारी निर्मातामा लेखबहादुर पुन र सहनिर्मातामा करुणाकर घिमिरे, सबिता गुरुङ, कुमार बस्नेत र यम बराल छन् । फिल्ममा दयाहाङ राई, सुरक्षा पन्त, विक्रान्त पन्त, बुद्धि तामाङ, वर्षा शिवाकोटी, सुनिल थापालगायत कलाकारको अभिनय छ ।
प्रतिक्रिया दिनुहोस !
