भूकम्पले भत्किएका स्वास्थ्यचाैकी बने

गोरखा : भूकम्पले भत्काएका गोरखाका सबै स्वास्थ्यचौकी तीन वर्षको अवधिमा निर्माण भइसकेका छन् । भत्किएका ५५ वटै स्वास्थ्यचौकी निर्माण सम्पन्न भएको वरिष्ठ जनस्वास्थ्य प्रशासक केदार पराजुलीले जानकारी दिए । उनका अनुसार निर्माण सम्पन्न भएकामध्ये तीन वटा हस्तान्तरण गर्न बाँकी छन् । निर्माण सम्पन्न भएकामध्ये सातवटा सरकारी निकायले र बाँकी सबै अन्तर्राष्ट्रिय गैरसरकारी संस्था (आईएनजीओ)को सहयोगमा बनेका हुन्।

सबभन्दा धेरै स्वास्थ्यचौकी युनिसेफले निर्माण गरिदिएको जिल्ला जनस्वास्थ्य कार्यालयका एनजीओ समन्वय शाखाका नानीबाबु दानीले जानकारी दिए । युनिसेफले १३ वटा स्वास्थ्यचौकी बनाइदिएको छ । सेभ द चिल्ड्रेनले आठ वटा, आइएमसीले सात वटा, असल छिमेकी पोखराले पाँच वटा, केयर नेपालले तीन वटा, नेदरल्यान्ड लेप्रोसी रिलिफ (एनएलआर)ले एउटा र वल्र्डभिजनले दुइटा स्वास्थ्यचौकी निर्माण गरेको दानीले बताए ।

त्यस्तै, शुभ अवसर ग्रामले दुई वटा, गुडनेबर्स इन्टरनेसनलले चार वटा, फेस नेपालले दुई वटा, माउन्टेन चाइल्डले एउटा, कम्युनिटी एक्सन नेपाल (क्यान)ले पाँच वटा स्वास्थ्यचौकी बनाएको छ । लोककल्याणकारी संघ नेपाल (स्वान नेपाल) नामक एनजीओले १० वटा स्वास्थ्यचौकी बनाएको छ । तर, अस्थायी संरचना मात्र बनाएको दानीले बताए ।

नेपाल सरकारले थालाजुङ, खोप्लाङ, सिर्दिबास, बोर्लाङ, भच्चेक, घ्याल्चोक र आरुआर्बाङ स्वास्थ्यचौकी निर्माण गरेको जिल्ला जनस्वास्थ्य प्रमुख पराजुलीले बताए ।

भूकम्पपछि निर्माण भएका स्वास्थ्य संस्थामा बर्थिङ सेन्टर पनि छन् । ‘भूकम्पपछि निर्माण सम्पन्न भएका स्वास्थ्यचौकीमा २४ घण्टे प्रसूति केन्द्र पनि तयार भएका छन्’, वरिष्ठ जनस्वास्थ्य प्रशासक पराजुलीले भने, ‘जसले बनायो उसले स्वास्थ्यचौकीमा आवश्यक औषधी, उपकरण, फर्निचर र क्वाटरका लागि आवश्यक पलङ, ओढ्ने ओछ्याउने, भाँडाकुँडासमेत उपलब्ध गराएका छन् ।’

भूकम्प गएको ६ महिनाभित्र निर्माण सम्पन्न गर्ने सम्झौता गरे पनि स्वास्थ्यचौकी निर्माण गर्न करिब तीन वर्ष लागेको हो । ‘पाँच गुना बढी समय लाग्यो तर ढिलै भए पनि अहिले सुविधा सम्पन्न स्वास्थ्यचौकी बनेका छन्’, जिल्ला जनस्वास्थ्य प्रमुख पराजुलीले भने, ‘भूकम्पले क्षतिग्रस्त भएका बेला गरेको सहयोग अविस्मरणीय छ ।’