सुन तस्करीः आरके ज्वेलर्सका मालिक राजेन्द्र शाक्य पक्राउ

काठमाडौँः ३३ किलो सुन तस्करी प्रकरणमा काठमाडौँको न्यूरोडस्थित आरके ज्वेलर्सका मालिकलाई प्रहरीले पक्राउ गरेको छ । आरके ज्वेलर्सका मालिक राजेन्द्र शाक्यलाई विहीबार साँझ पक्राउ गरिएको हो । 

प्रहरीकै मिलेमतोमा ३३ किलो सुन लुटपाट भएको आशंकामा गृह मन्त्रालयद्वारा गठित छानविन समितिले विस्तृत अनुसन्धान थालेलगत्तै शाक्य पक्राउ परेका हुन् । 

 समितिले शाक्यसहित २१ जनालाई पक्राउ गरेर अनुसन्धान थालेको छ । यसअघि सुन तस्करीमा मुछिएका एक अभियुक्तले हिरासतमै आत्महत्या गरेका छन्  । त्रिभुवन विमानस्थलमा लोडरका रुपमा कार्यरत प्रेमलाल चौधरीले महानगरीय प्रहरी वृत्त सिंहदरबारको हिरासतमै झुन्डिएर आत्महत्या गरेका हुन् । 

प्रहरीका अनुसार चौधरीले वृत्तको हिरासतमा रहेको शौचालयमा पासो लगाएर आत्महत्या गरेका थिए । उनीमाथि ३३ किलो सुन तस्करीमा मतियार भएको आरोप लगोको थियो । चौधरीलाई तीन दिनअघि प्रहरीले पक्राउ गरेको थियो । 

गृह मन्त्रालयका अनुसार यसअघि पक्राउ पर्नेमा थाई एयरलाइन्सका ११ जना कर्मचारी, नेपाल एयरलाइन्सका तीन जना कर्मचारी र अन्य व्यवसायी पनि छन् । 

समितिले केही दिनअघि मात्रै मनाङ होटलका मालिक भुजुङ गुरुङलाई समेत नियन्त्रणमा लिएको थियो । त्यसैगरि व्यवसायीहरु बालकृष्ण श्रेष्ठ, कपिलराज पुरी, गोपाल कुमार श्रेष्ठ, दोराम खत्री, सम्बिर प्रसाद तोलाङ्गे, हेमन्त गौतम, ‘तक्लु’ भन्ने पुण्यप्रसाद लामा, विरेन्द्रमान श्रेष्ठ, लाल बहादुर मगर, राजु महर्जन र भारतीय नागरिक महाविर गोल्यान पक्राउ परिसकेका छन् ।

मन्त्रालयका सहसचिव ईश्वर पौडेल नेतृत्वको छानविन समितिले विराटनगर र मोरङसम्म पुगेर घटनाको सम्पूर्ण विवरण लिएको छ । समितिकै सिफारिसका आधारमा महानगरीय प्रहरी अपराध महाशाखाका प्रमुख एसएसपी दिवेश लोहनी, डिएसपी प्रजित केसी र सई बालकृष्ण सञ्जेललाई प्रहरी मुख्यालयले जिम्मेवारीबाट हटाइसकेको छ । सुन तस्करले सुन लुटेर घटना गुपचुप गराउन सुन बोक्ने भरिया सनम शाक्यको हत्यासमेत गरेको आरोप छ ।

महाशाखाले गत फागुन १९ गते काठमाडौं देखि मोरङमा प्रहरी पठाएर तीन जना पक्राउ पक्राउ गरेको थियो भने हत्या गरिएका शाक्यको शव स्कोरपियो गाडीबाट बरामद गरेको थियो । गत माघमा ३३ किलो पाँच सय ग्राम सुन काठमाडौंबाट लुटिएको थियो । प्रहरीका अनुसार लुटिएको सुन दुवईमा बसेर अवैध रुपमा सुनको कारोबार गर्ने गोरे भन्ने चुडामणी उप्रेतीको हो । उप्रेतिले नै आफैंले पठाएको सुन नाटकीय ढंगले लुटपाट गरेको आशंका प्रहरीको छ ।

समितिका संयोजक पौडेलका अनुसार छानविन विस्तृत रुपमा भइरहेको छ । उनले भने, ‘कार्यक्षेत्र भन्दा बाहिर गएर प्रहरीले किन अप्रेशन गयो, सुनका मुख्य नाईके किन पक्राउ गरिएन । सुन लुटपाटमा प्रहरीको संलग्नता छ वा छैन भन्नेबारे छानविन अगाडी बढको छ ।’