विद्यार्थी नपाँउदा संकटमा स्रोत विद्यालय
कालिकोट : कालिकोटको नरहरिनाथ गाउँपालिका–१ कोटवाडास्थित नन्दादेवी माध्यमिक विद्यालयमा रहेको बहिरा स्रोत विद्यालय विद्यार्थी नपाउँदा संकटमा परेको छ । एक जना तालिमप्राप्त शिक्षकको दरबन्दीसहित १० जना बालबालिका पढ्न पाउने कोटा भए पनि विद्यालयमा बहिरा बालबालिका भर्ना हुन नआउँदा विद्यालय संकटमा परेको हो ।
२०५३ सालबाट सञ्चालनमा आएको कोटवाडाको बहिरा स्रोत विद्यालयमा हालसम्म ३० जना बालबालिकाले पढेर तीन चरण प्रेप १, २ र ३ पास गरिसकेका छन् । तिनीहरूलाई माथिल्लो कक्षा पढ्न सुर्खेत पठाइएको छ । २०५३ सालदेखि अहिलेसम्म पढाइ आएको बहिरा स्रोत कक्षामा आवश्यक कोटाअनुसार विद्यार्थी नहुँदा अहिले बन्द हुने अवस्थामा पुगेको विद्यालयका शिक्षक छत्रबहादुर विष्टले बताए । ‘विद्यालयमा राज्यको लगानी छ । तर विद्यार्थी नपाएपछि विद्यालय चलाउन गाह्रो भएको छ’, उनले भने ।
धौलागोह गाविस–१ का सुरजिन रोकायका दुई छोरा १० वर्षीय कृष्णबहादुर रोकाय र ८ बर्षीय निराजन रोकायले अहिले यहाँ अध्ययन गरिरहेका छन् । खानेबस्ने सेवासुविधा हुँदाहुँदै पनि जिल्लामा बहिरा विद्यार्थी नपाइएपछि विद्यालय सञ्चालनमा चुनौती थपिएको छ ।
सेभ द चिल्डे«नको आर्थिक सहयोगमा किर्डाक नेपाल कालिकोटले कोडबाडाको बहिरा स्रोत विद्यालयलाई लत्ताकपडा, शैक्षिक सामग्री, फर्निचरलगायत सहयोग गरी थप व्यवस्थित बनाइएको छ । तर पनि पहिलेका विद्यार्थी अपग्रेड भएर बाहिर गएपछि अहिले विद्यार्थी नपाँउदा विद्यालय बन्द हुने अवस्थामा पुगेको हो । कालिकोटका चार विद्यालयमा बहिरा स्रोत कक्षा सञ्चालन भइरहेको जिल्ला शिक्षा अधिकारी विष्णुप्रसाद तिवारीले जानकारी दिए ।
कोटाअनुसारका विद्यार्थी नपाउँदा विद्यालय सञ्चालनमा चुनौती थपिएको हो ।
सरकारले वार्षिक रूपमा विद्यालयमा प्रति एकजना विद्यार्थी खानबस्न, पढ्ने सबै खर्च गरी वार्षिक ५० हजार रुपैयाँका दरले बजेट खर्च गर्दै आएको उनले बताए । जिल्लाका साविकका गेला, स्युना, पाँखा र कोटवाडा गाविसमा गरी चार विद्यालयमा बहिरा स्रोत कक्षा सञ्चालन हुँदै आएका छन् । त्यसमा पाखामा १०, स्युनामा १०, गेलामा सात र कोटबाडामा दुईजना मात्र विद्यार्थी रहेको उनले जानकारी दिए । यस वर्षबाट ती दुई विद्यार्थीलाई अन्य विद्यालयमा सारेर कोटबाडामा बहिरा स्रोत विद्यालय बन्द गर्नुपर्ने अवस्था आएको उनको भनाइ छ ।
०००
बहिरा स्रोत विद्यालयमा बालबालिकालाई पढाउँदै शिक्षक । बिस्नप्रसाद न्यौपाने
प्रतिक्रिया दिनुहोस !
