भोजपुर : स्थानीय सरकार गठन भएको नौ महिना बिते पनि विकास निर्माणका काम कछुवा गतिमा छ । जिल्लाका कतिपय गाउँपालिकामा कर्मचारी अभावका कारण योजना तथा कार्यक्रम अघि बढ्न सकेका छैनन् ।
साल्पासिलिछो गाउँपालिका विकासका हिसाबले सबैभन्दा पछि छ । गाउँपालिका कार्यालयमै कर्मचारी नहुँदा दैनिक कार्यसम्पादनमा समस्या भइरहेको जनाइएको छ । गाउँपालिकाका कार्यकारी अधिकृत अशोक विष्ट र लेखापाल राम दाहालले बाहिर–बाहिरै सरुवा मिलाइसकेको गाउँपालिका अध्यक्ष महेश राईले बताए ।
‘कार्यकारी अधिकृृतले हामीसँग कुनै जानकारी नै नलिई बाहिरै सरुवा मिलाएर जानुभएछ’, अध्यक्ष राईले भने, ‘लेखापाल पनि सरुवा हुनुभयो । जनताको प्रतिनिधि भएर मात्र के गर्नु ? कार्यालयमा कर्मचारी नहुँदा काम धान्नै गाह्रो भएको छ ।’ लेखा, प्रशासनको काम करारमा नियुक्त प्राविधिकलाई दिइएको उनले बताए ।
कृषि, पशु र स्वास्थ्यबाहेक अन्य विषयगत शाखामा कर्मचारी छैनन् । डेढ महिनाअघि कृषि शाखा हेर्ने कर्मचारी पनि सरुवा भएपछि अहिले दुईटा शाखा मात्र सञ्चालनमा छन् । ६ वडा रहेको गाउँपालिकामा तीनवटा सचिवविहीन अवस्थामा छन् । तीन वडासचिवले नै बाँकी काम पनि धानिरहेका छन् । कर्मचारी अभावका कारण गाउँपालिकाका योजना अलपत्र परेका छन् ।
भोजपुरका स्थानीय तहमा दरबन्दीअनुसार कर्मचारी नहुँदा दैनिक कार्यसम्पादनमा समस्या
आमचोक गाउँपालिकामा वडासम्ममै कर्मचारी पद रिक्त हुँदा दैनिक कार्यसम्पादन प्रभावित बनेको छ । अहिले कार्यकारी अधिकृत र सहलेखापालका भरमा काम चलिरहेको छ । प्रशासन हेर्ने नायबसुब्बा, इन्जिनियर, प्राविधिकलगायत १७ र वडासचिव गरी ३७ कर्मचारी नहुँदा काम गर्न समस्या भएको कार्यकारी अधिकृत यमबहादुर उपरकोटीले बताए । विषयगत शाखामा एक जना पनि कर्मचारी छैनन् भने १० वडामध्ये आठवटा सचिवविहीन छन् । सात वडामा अहेव र एक वटामा खानेपानीको प्राविधिकलाई सचिव सिफारिस गर्न समन्वय भइसकेको उनले बताए । पटक–पटक जिल्ला प्राविधिक कार्यालयसँग कर्मचारी माग गरिए पनि दिन नसकेको गुनासो उनले गरे ।
‘इन्जिनियर नहुँदा अहिले करिब ७० लाख रुपैयाँबराबरका चारवटा ठूला योजना रोकिएका छन्’, उनले भने ।
प्रशासनबाहेक अन्य कर्मचारी पदपूर्ति भएको अरुण गाउँपालिकाका चार वडामा सचिव छैनन् भने वडा नम्बर २ का सचिवलाई प्रशासनमा ल्याइएको छ । महिला तथा बालबालिका र भूसंरक्षणबाहेक विषयगत कार्यालयमा कर्मचारी समायोजन भइसकेका छन् ।
डेढ महिनाअघि पौवादुङ्मा गाउँपालिकाका चार वडा सचिवविहीन थिए । चैत १ मा नियुक्ति पाएका सचिवलाई खाली वडामा तानिएको छ भने गाउँपालिका कार्यालयमा सबै कर्मचारी पूर्ति भएको देखिन्छ । विषयगत शाखामा कृषि र पशुतर्फ कर्मचारी अभाव देखिन्छ ।
टेम्के मैयुङ गाउँपालिकाका चार वडा सचिवविहीन छन् । विभिन्न बहानामा सरुवा मिलाएर अन्त जाने प्रवृत्तिले कर्मचारी कोटा खाली भएको गाउँपालिकाका अध्यक्ष धु्रवराज राईले बताए । गाउँपालिकाका विषयगत शाखा सबै कर्मचारीविहीन हुँदा योजनाका काममा अन्योल भएको उनले सुनाए ।
नौ वडा रहेको हतुवागढी गाउँपालिकामा अहिले तीनवटामा मात्र सचिव छन् । सबैजसो कर्मचारी समायोजन भए पनि विषयगत शाखातर्फ कृषि, शिक्षा, महिला तथा बालबालिका, पशु र स्वास्थ्यबाहेक अन्यमा कर्मचारी छैनन् । कार्यकारी अधिकृत रामकुमार पुडासैनीले दरबन्दीअनुसारका कर्मचारी माग गरिए पनि नआएको बताए ।
रामप्रसाद राई गाउँपालिका कार्यालय लेखापालका भरमा सञ्चालन भइरहेको छ । कार्यालयको काम गर्न गाह्रो भएपछि महिला र भूसंरक्षण कार्यालय हेरिरहेका मनोजकुमार शर्मालाई लेखापालमा नियुक्त गरिएको थियो । अन्य शाखा हेर्न गाउँपालिकाले जिल्ला प्राविधिक कार्यालयमा कर्मचारी माग गरे पनि दिन नसकेको कार्यकारी अधिकृत विक्रम लिम्बूले बताए । विषयगत कार्यालयमध्ये शिक्षा शाखाको मात्र टुंगो नलागेको उनले बताए ।
षडानन्द नगरपालिकामा भने एक जना वडासचिवको काँधमा दोहोरो कार्यभार छ । गाउँपालिका कार्यालयमा सबैजसो कर्मचारी पूरा भए पनि नगरपालिकामा एक जना वडासचिवलाई दुई÷दुई वडाको काम धान्नुपर्ने सास्ती छ । विषयगततर्फ पशु र महिला तथा बालबालिका कार्यालय कर्मचारीविहीन छन् । कर्मचारी आउन लागेको उपमेयर मेरिका राईले जानकारी दिइन् ।
भोजपुर नगरपालिका कार्यालय र सबै विषयगत कार्यालयमा कर्मचारी पूर्ति भएको छ । केही वडा सचिवविहीन भए पनि अरूले धानिरहेको मेयर कैलाशकुमार आलेले बताए । ‘स्थानीय तहमा धेरै अधिकार आए पनि कर्मचारीका कारण हामीलाई काम गर्न कठिनाइ भयो’, उनले भने ।
प्रतिक्रिया दिनुहोस !
