ढाका: शनिबारबाट बंगलादेशको राजधानी ढाकामा सुरु हुने एसियाली भलिवल महासंघ (एभिसी) सेन्ट्रल जोन भलिवल प्रतियोगितामा नेपाल तुलनात्मक रुपमा सहज समुहमा परेको छ । शुक्रबार गरिएको ‘टाईसिट ड्र’मा नेपाल आयोजक बंगलादेश र माल्दिभ्स रहेको समुह एमा परेको हो ।
समुह बीमा साविक बिजेता कीर्जिस्तान, तुर्कमेनिस्तान र उज्बेकिस्तान परेका छन् । गत वर्ष माल्दिभ्समा भएको प्रतियोगितामा किर्गिस्तानले नेपाललाई पराजित गर्दै उपाधि जितेको थियो । नेपालले तुर्कमेनिस्तान र उज्बेकिस्तानसँग भने अहिलेसम्म खेलेको छैन । यद्यपि यी तीनै टोलीसँग ‘हाईट एटभान्टेज’ र खेल पनि राम्रो रहेकाले नेपाललाई समुह ए सहज मानिएको हो ।
नेपाल समुह एमा पर्दा पदकको सम्भावना समेत बढेको छ । नेपालले समुह एमा एक खेल जितेको अवस्थामा सेमिफाइनल प्रवेशको सम्भावना रहन्छ । सेमिफाइनल पुगेपछिको एक जितले नेपालको फाइनल यात्रा मात्रै पक्का हुने छैन, कम्तिमा रजत पदक पनि पक्का हुने छ । अन्तिम चारको पहिलो खेलमा पराजित भएको अवस्थामा समेत तेस्रो स्थानका लागि हुने अर्काे खेलमा जित हात पारे, नेपालले काश्य पदक जित्ने छ ।
समुह चरणमा नेपालका प्रतिद्धन्दि बंगलादेश र माल्दिभ्सलाई पछिल्लो भेटमा पराजित गरेकाले पनि नेपालको सेमिफाइनल सम्भावना बलियो मानिएको छ । नेपालले माल्दिभ्सलाई गत बर्ष उसैले आयोजना गरेको सेन्ट्रल जोन भलिवल प्रतियोगितामा पराजित गरेको थियो ।
यो प्रतियोगिताबाट नेपालले काश्य पदक जितेको थियो जुन अन्तर्राष्ट्रिय प्रतियोगितामा नेपाली पुरुष भलिवलले जितेको पहिलो र एक मात्र पदक बनेको छ । यस्तै बंगलादेशलाई नेपालमै भएको दुई मध्ये दुबै मैत्रीपुर्ण खेलमा पराजित गरेको थियो ।
आयोजकविरुद्ध नेपालको पहिलो खेल
प्रतियोगिताअन्तर्गत शनिबार हुने उद्घाटन खेलमा नेपालले आयोजक बंगलादेशसँग प्रतिस्पर्धा गर्दै छ । राजधानी ढाका स्थित बङ्गबन्धु स्टेडीयममा प्रतियोगिताको उद्घाटन समारोहसँगै दीनको चार बजेबाट सुरु हुने खेलमा नेपाली आयोजक टोलीविरुद्ध उत्रने छ ।
नेपाली टोलीले आयोजक बंगलादेशलाई पराजित गर्दै प्रतियोगिताको सुखद् सुरुवात गर्ने योजना बनाएको छ । बंगलादेशविरुद्धको जितले सेमिफाइनल चरणको यात्रा बलियो हुने र पराजयले प्रतियोगिताबाटै बाहिरनु पर्ने अवस्थालाई बुझेको नेपाली टोलीले जितकै रणनिती बनाएको हो ।
नेपाली टोलीका कप्तान इम राना मगर बंगलादेशविरुद्धको खेल नेपालका लागि निक्कै महत्वपुर्ण रहेको बताउछन् । ‘बंगलादेशविरुद्धको खेल हाम्रा लागि निक्कै महत्वपुर्ण छ । पहिलो खेलमा बंगलादेशलाई पराजित गर्न सकेको अवस्थामा सेमिफाइनल यात्रा सहज हुने छ’, कप्तान राना मगर भन्छन्, ‘हामी जितसहित प्रतियोगिताको सुखद् सुरुवात गर्न चाहन्छौं ।’ उनी बंगलादेशविरुद्ध सर्भिस र रिसिभमा योजनाअनुसार राम्रो भए जित पक्का रहेको बताउँछन् ।
नेपाली टोलीका प्रशिक्षक जगदिश भट्टको प्रतिकृया पनि उस्तै छ । पछिल्लो खेलको नतिजा र खेलको स्तरलाई हेर्ने हो भने नेपाल जितको दाबेदार भएको उनी बताउछन् ।
‘बंगलादेशविरुद्ध हालै भएको दुई मैत्रीपुर्ण खेलमा हामी बिजयी भएका छौं । त्यस अघि सेन्ट्रल जोनअन्तर्गत बंगलादेशमै भएको खेलमा पनि हामीले जित हात पारेका छौं’, प्रशिक्षक भट्ट भन्छन्, ‘हङ्कङ र मकाउविरुद्ध हालै भएको तीन वटा मैत्रीपुर्ण खेलमा समेत निरन्तर बिजयी रहेकाले नेपाली टोलीको मनोबल पनि उच्च रहेको छ । त्यसैले प्रतियोगिताको सुखद् सुरुवात गर्नेमा म ढुक्क छु ।’
प्रशिक्षक भट्टले नेपाली टोलीको कमजोर देखिएको क्विक स्पाइक र ब्लकमा समेत बिशेष योजना बनाएको सुनाए । ‘हामीले सर्भिस सशक्त गरेर उनीहरुको रिसिभलाई कमजोर बनाउन सक्नुपर्छ । त्यसपछि हाम्रो रिसिभमा केही मेहनत गर्न सक्यौ भने क्विक स्पाइक र ब्लकको कमजोरी पनि कभर हुने छ’, प्रशिक्षक भट्ट भन्छन्, ‘बंगलादेशसँग घरेलु मैदानको फाइदा छ । तर, उसलाई जित्नै पर्ने दबाब पनि छ । हामी उनिहरुलाई परेको दबाबको फाइदा लिन चाहन्छौं ।’
मध्य एसियाका दोस्रो स्तरका टोलीहरुका लागि प्रत्येक वर्ष आयोजना हुदै आएको सेन्ट्रल जोन प्रतियोगिता नेपालका लागि निक्कै महत्वपुर्ण प्रतियोगिता हो । सेन्ट्रल जोन प्रतियोगिताको चौथो संस्करण आयोजना भईरहदा नेपालले पनि चौथो पटक सहभागीता जनाएको हो ।
नेपाली टोली
ओपन स्पाईकर: मानबहादुर श्रेष्ठ, धनबहादुर भट्ट क्षेत्री, कुलबहादुर थापा,
क्विक स्पाईकर: हरि अधिकारी, दीपकराज जोशी, सुरेन्द्र बम,
अलराउन्डर: नरेन्द्र गिरी, राजु थकाली
लिब्रो: इश्वर थापा, बिनोद चन्द
सेटर: इम राना, दीनेश गिरी
प्रतिक्रिया दिनुहोस !
