मिरपुर (बंगलादेश): सेमिफाइनलमा बलियो प्रतिद्वन्द्वी तुर्कमेनिस्तानसँग सोझो सेटमा पराजित भएसँगै एसियन भलिबल महासंघ (एभीसी) सेन्ट्रल जोन प्रतियोगिताको उपाधि जित्ने नेपालको सपना सकिएको छ । नेपाल बुधबार भएको पहिलो सेमिफाइनल खेलमा तुर्कमेनिस्तानसँग २५–१४, २५–१८, २५–१९ को सेटमा पराजित भयो ।
नेपालले अब तेस्रो स्थानका लागि प्रतिस्पर्धा गर्ने छ । नेपालले तेस्रो स्थानका लागि शुक्रबार हुने खेलमा आयोजक बंगलादेश वा कीर्गिस्तानमध्ये एक टोलीसँग प्रतिस्पर्धा गर्ने छ । कीर्गिस्तान र बंगलादेश दोस्रो सेमिफाइनल खेलमा अहिले प्रतिस्पर्धा गरिरहेका छन् ।
बंगलादेशमै भएको एभिसी सेन्ट्रल जोन भलिवल प्रतियोगिताको पहिलो संस्करणको उपाधि जितेको तुर्कमेनिस्तानविरुद्ध नेपालले ब्लक र सिसिभमा निक्कै कमजोर प्रदर्शन गरेको थियो ।
एभिसी सेन्ट्रल जोन प्रतियोगितामा तुर्कमेनिस्तानविरुद्ध नेपालको यो लगातार तेस्रो पराजय हो । पहिलो संस्करणसँगै गत वर्ष माल्दिभ्समा भएको तेस्रो संस्करणको खेलमा पनि नेपाल तुर्कमेनिस्तानसँग पराजित भएको थियो ।
खेलपछि नेपाली टोलीका प्रशिक्षक जगदिश भट्टले खेलाडीले सोचेको जस्तो खेल्न नसक्दा पराजित हुन पुगेको प्रतिकृया दिए । ‘तुर्कमेनिस्तान हामी भन्दा बलियो टोली हो । यद्यपि हामीले उनीहरुविरुद्ध केही योजना बनाएका थियौं’, प्रशिक्षक भट्टले भने, ‘यद्यपि योजनाअनुसारको खेल हुन सकेन ।’
नेपालले सेन्ट्रल जोन प्रतियोगितामा गत वर्ष काश्य पदक जितेको थियो । नेपालको राष्ट्रिय खेल भलिबल टीमले जितेको त्यो नै पहिलो र एकमात्र अन्तर्राष्ट्रिय प्रतियोगिता बनेको छ ।
यस पटक पनि नेपालको काश्य पदक जित्ने सम्भावना अझै छ । अब नेपालले तेस्रो स्थानका लागि हुने खेलमा जित हात पार्नुपर्ने छ । उपाधि सम्भव नभएपछि प्रशिक्षक भट्टले नेपाली टोली अब काश्य पदककै लागि प्रतिस्पर्धा गर्ने बताए ।
प्रतिक्रिया दिनुहोस !
