कोहलपुर : नेपालगन्ज कप क्रिकेटको उपाधि एनआईसी एसिया दंगाली गोर्खाजले जितेको छ । कोहलपुरमा बुधबार भएको फाइनलमा पप्पु कन्ट्रक्सन रोल्पा गोरिल्लाजलाई आठ विकेटले पराजित गर्दै दंगाली गोर्खाज च्याम्पियन बनेको हो । दंगाली गोर्खाजले एक लाख ११ हजार नगद प्राप्त गर्यो ।
कोहलपुरको प्रस्तावित अन्तर्राष्ट्रिय क्रिकेट मैदानमा सम्पन्न खेलमा पहिले ब्याटिङ गरेको रोल्पा गोरिल्लाजले १९.१ ओभरमा अलआउट हुँदै ८९ रनको योगफल खडा गरेको थियो । रोल्पा गोरिल्लाजको पालिमा कप्तान सौरभ खनालले तीन, रमेश सिंहले एक, आकाश थापाले पाँच, नन्दन यादवले १०, समसुद्दिन अन्सारीले चार तथा भीम सार्कीले तीन रन बनाए । उपविजेता बनेको रोल्पा गोरिल्लाजले ६० हजारमा चित्त बुझायो ।
९० रनको लक्ष्य लिएर जवाफी ब्याटिङमा उत्रिएको दंगाली गोर्खाजले आठ ओभरमा दुई विकेट गुमाएर लक्ष्य पूरा गर्यो । दंगाली गोर्खाजलाई विजयी बनाउन कप्तान सन्दीप सुनारले आक्रामक ब्याटिङ गर्दै २४ बलमा आठ चौका र दुई छक्काको मद्दतले ४६ रन जोडे । यस्तै मनोज सुनारले अविजित २४ रन बनाए । फाइनल खेलको म्यान अफ दी म्याच दंगाली गोर्खाजका सन्दीप सुनार घोषित भए ।
प्रतियोगिताको उत्कृष्ट खेलाडी एबरोल टीएमटी लुम्बिनी यात्रिजका बसिर अहमद घोषित भए । यस्तै उत्कृष्ट ब्याट्सम्यान रोल्पा गोरिल्लाजका सौरभ खनाल र उत्कृष्ट बलर दंगाली गोर्खाजका साहिद अन्सारी घोषित भए । यसैगरी उदीयमान खेलाडी दंगाली गोर्खाजका सदाब अन्सारी, फेयर क्याप्टेन पाल्पा योद्धाजका सिद्धान्तराज शाही, फेयर प्ले टिम पनि पाल्पा योद्धाज घोषित भए ।
प्रतिक्रिया दिनुहोस !
