नेपाल आइडल सिजन–२ :  अडिसनका लागि रोल्पादेखि पोखरा

नेपाल आइडल सिजन–२ :  अडिसनका लागि रोल्पादेखि पोखरा

पोखरा : रोल्पा हरिगाउँका २७ वर्षीय युवराज घर्तीमगर नेपाल आइडलको सिजन–२ को अडिसनमा सहभागी हुन पोखरा आइपुगेका छन् । काठमाडौंको मूच्र्छना संगीतालयमा मनोजराज शिवाकोटीसँग संगीत सिकिरहेका मगर नेपाल आइडलमा सहभागी हुन पाउँदा निकै उत्साहित छन् ।

उनीसँगै पोखरा घुम्न आएका भोजपुर षडानन्द नगरपालिकाका २९ वर्षीय रवीन्द्र राई पनि पहिलोपटक नेपाल आइडलको अडिसनमा सहभागी हुन पाएकोमा निकै खुसी देखिए । रोल्पाबाट आएका युवराज र भोजपुरका रवीन्द्र मुग्लिनमा भेट भएपछि सँगै पोखरा आएका हुन् । पोखरा घुम्न आएका तीन साथीमध्ये दुईजनाले पोखरा घुमाइलाई जीवनकै अविस्मरणीय बनाउन अडिसन यहीँबाट दिएको सुनाए । सानै उमेरदेखि गायनमा रुचि राख्ने डिप्लोमा अध्ययनरत राईले पनि काठमाडौंको बसुन्धरामा संगीत सिकेका छन् । गीतसंगीतमा सानैदेखि लगाव भएका रोल्पाका युवराजले माओवादी द्वन्द्वका बेला सामना परिवारले गाएका गीतले संगीतमा रुचि जगाउन सघाएको सुनाए ।

धादिङ पुच्छरबजारका १६ वर्षीय कृषल कँडेलले नेपाल आइडलमा दोस्रोपटक सहभागी हुन पोखरा आएको बताए । पहिलो नेपाल आइडलमा पोखराबाट छनोट भए पनि घरायसी कारणले काठमाडौं जान नपाएकाले फेरि थप तयारीका साथ अडिसन दिन पोखरा आएको उनले सुनाए । पहिलो नेपाल आइडलमा प्रथम चरणबाटै बाहिरिएका पर्वत कुस्मा बजारका राजकुमार परियार पनि सिजन–२ को अडिसनका लागि संगीत सिकेर विशेष तयारीका साथ आएका छन् । ‘नेपाल आइडल मेरो सपना हो, त्यसैले थप तयारीका साथ आएको हुँ’, उनले अन्नपूर्णसँग भने ।

नेपाल आइडलमा पहिलोपटक सहभागी हुन आएकी तनहुँकी शृंखला वाग्ले अडिसनस्थल पोखरा सिमलचौरको जनप्रिय माविको प्रांगणमा गीत गुन्गुनाउँदै थिइन् । पोखराको पृथ्वीनारायण क्याम्पसमा डिप्लोमा अध्ययनरत उनले नेपाल आइडल आफ्नो मीठो सपना भएको सुनाइन् । सिन्धुलीका मोहन लामा, चितवनकी एलिसा सापकोटा, पोखरा बिरौटाकी अदिती शर्मा, पोखरा पुम्दीभुम्दीका महेन्द्र बराल एकै ठाउँमा बसेर अडिसनको तयारीबारे छलफल गरिरहेका थिए । पहिलो नेपाल आइडलमा जज राउन्डबाट बाहिरिएकी अदितीले अहिले अडिसन दिन संगीत सिकेर आएको सुनाइन् । गण्डकी ताराको विजेतासमेत रहेकी शर्माले यसपालि आपूm नेपाल आइडलमा राम्रो क्षमता देखाउने आत्मविश्वास सुनाउँदै थिइन् ।

पहिलो नेपाल आइडलमा सफलता नमिलेपछि पोखराको गुरुकुल र त्रिवेणी संगीतालयमा संगीत सिकेका बरालले नेपाल आइडल आफ्नो सपना भएकाले तयारीका साथ फेरि आएको बताए । यसपटकको नेपाल आइडलमा राष्ट्रिय ख्यातिप्राप्त गायक कर्ण दासका छोरा माकुस दास पनि अडिसन दिन आइपुगेका छन् । पोखरा रामबजारका दास बाबाको संगीतबाट प्रभावित भएर आफूले पनि संगीत सिकेर तयारीका साथ नेपाल आइडलमा सहभागी भएको उनी बताउँछन् । व्यस्तताका कारण पहिलो नेपाल आइडलमा सहभागी जनाउन नपाएको दुःख उनीसँग छँदैछ । दासले अहिले बाबा र साथीभाइको सुझावले नेपाल आइडल अडिसनमा सहभागी हुन आएको बताए । मेलोडियस गायन मन पराउने दाससँग सबैखाले गीत गाउनसक्ने आत्मविश्वास छ ।

एपीवान टेलिभिजनले आयोजना गरेको गायन प्रतियोगिता नेपाल आइडलमा १६ देखि ३० वर्ष बीचका युवाको सहभागिता छ । पोखराले पहिलो नेपाल आइडलको उपाधि जितिसकेको छ । पोखरामा भएको दोस्रो सिजनको अडिसनमा पनि उत्साहका साथ संगीतप्रेमी युवाको उल्लेख्य सहभागिता भएको नेपाल आइडलका प्रोजेक्ट हेड तथा डाइरेक्टर सुरेश पौडेलले बताए ।

नेपाल आइडलको दोस्रो सिजनको उपाधि विजेतालाई प्राप्त हुने पुरस्कारबारे सबै अडिसन समाप्त भइसकेपछि घोषणा हुनेछ । नेपाल आइडल एपीवान टेलिभिजनले निर्माण र प्रसारण गरे पनि नेपालकै गर्वको विषय भएको प्रोजेक्ट हेड पौडेलले बताए । पहिलो संस्करणको नेपाल आइडल अत्यधिक सफल भएको र दोस्रो सिजनलाई पनि दर्शक, संगीतप्रेमी, कलाकारले उत्तिकै माया गर्ने निर्णायक इन्दिरा जोशीको विश्वास छ । नेपाली संगीत क्षेत्रको उत्कृष्ट कलाकारको खोजीका लागि नेपाल आइडल दोस्रो सिजन थप महŒवपूर्ण हुने जोशीले बताइन् ।

यसअघि धनगढी, नेपालगन्ज, हेटौंडा, धरानमा अडिसन सकेर आइडलको टिम पोखरा आएको हो । त्यसपछि काठमाडौंमा अडिसन हुनेछ । एपीवान टेलिभिजनले नेपाल आइडलको दोस्रो सिजनलाई ३४ भागमा प्रसारण गर्नेछ । यही साउन १० देखि साताको दुई दिन एपीवान टेलिभिजनमा नेपाल आइडल प्रसारण हुने आयोजकले बताएका छन् ।

 


प्रतिक्रिया दिनुहोस !

Unity

working together is no longer optional-it is a matter of compulsion

Annapurna Media Network has announced the Unity for Sustainability campaign which comes into force from January 1, 2022. The main aim of this campaign is to 'lead the climate change dialogue' working closely with all the stakeholders on sustainable development mode, particulary focusing on climate-change issues.