धुनीजात्राको रौनक
बैतडी : मेलौली नगरपालिका–५, महारुद्रमा धुनीजात्राको रौनक छाएको छ । वैशाख शुक्ल नवमीमा सुरु भएको धुनीजात्रा बौद्ध पूर्णिमाको दिनसम्म मनाइन्छ ।
धुनीजात्रामा धामीहरूले आगोमा तताएर रातो बनाएको फलामको पन्यु चाट्छन् । यो नै जात्राको मुख्य आकर्षण रहेको स्थानीय संस्कृतिका जानकार गोपालराम पोखरेलले बताए । उनले भने, ‘तताएको पन्यु चाटे पनि देवीको शक्तिले धामीहरूलाई केही हुँदैन ।’
धुनीजात्रामा शीतलादेवीका रूपमा भगवतीको पूजाआजा पनि गरिन्छ । मेलौली–५ का वडाध्यक्ष बलभद्र दयालले भने, ‘धुनीजात्रामा सहभागी हुन सीमावर्ती भारतीय क्षेत्रका दर्शनार्थीसमेत आउँछन् ।’ धुनीजात्रामा दलित, बाह्मण, क्षेत्री सबै समुदायका मानिस एकै ठाउँमा जम्मा भएर पूजाआजा गर्ने चलनसमेत रहिआएको छ । वडाध्यक्ष दयालले भने, ‘समाजमा व्याप्त छुवाछूत हटाउन पनि यो जात्रा निकै सहयोगी बनेको छ ।’
धुनीजात्रामा हरेक दिन भगवतीको विशेष पूजाआजा हुन्छ । दमाहा बजाउने र धामी काँप्ने तरिका यो जात्राको अर्को आकर्षण मानिन्छ । करिब ६ दिनसम्म यो जात्रा लाग्छ ।
दसौं हजार दर्शनार्थी आउने धुनीजात्रामा शीतलादेवीको पूजाआजा गरेमा रोगव्याधि नष्ट हुने जनविश्वास छ । वडाध्यक्ष दयाल भन्छन्, ‘यसको प्रचारप्रसार गर्न सके धार्मिक पर्यटक भिœयाउन सकिन्छ ।’
प्रतिक्रिया दिनुहोस !
