मनाङलाई स्तब्ध बनाउँदै थ्रीस्टार माईभ्याली गोल्डकपको च्याम्पियन

इलामः ललितपुरको थ्रीस्टार क्लब इलामबाट सिजनको विजय यात्रा सुरु गरेको छ ।  इलाममा आयोजित चौथो अन्तरराष्ट्रिय आमन्त्रण माईभ्याली गोल्डकप फुटबल प्रतियोगिताको उपाधि हात पार्दै थ्रीस्टारले विजय यात्रा सुरु गरेको हो । 

सोमबार भएको फाइनलमा चिरप्रतिद्वन्द्वी मनाङ मस्र्याङ्दी क्लब काठमाडौँलाई अतिरिक्त समयमा १-० गोलको जित निकाल्दै थ्रीस्टारले उपाधि चुमेको हो । 

निर्धारित समयमा गोलरहित बराबरीमा खेल टुङ्गिएपछि अतिरिक्त समयको सदुपयोग गर्दै थ्रिस्टारले उपाधी हातपारेको थियो । अतिरिक्त समयको तेश्रो मिनेटमा थ्रीस्टारका सुनिल बलले गोलले नेपाली फुटवलको स्टार टीम थ्रिस्टारलाई उपाधिको दाबेदार बनाएको थियो । 

दर्शकले खचाखच भएको इलामको ठुलो टुँडीखेलमा नेपालका दुई उत्कृष्ट टीमको प्रर्दशन निक्कै रोमाञ्चक भएको थियो । दुवै टीमले एक अर्कालाई निक्कै दबाबमा राखेका थिए । दुबै टीमले प्रसस्त अवसर पाए पनि सदुपयोग गर्न सकेका थिएनन् । 

मनाङका प्रशिक्षक फुजा टोपे र थ्रीस्टारका प्रशिक्षक मेघराज केसीले फेयर खेल भएको भन्दै सन्तोष व्यक्त गरे । यस अघिका खेलमा रेफ्रिको निर्णय प्रति टिमहरुले असन्तुष्टि व्यक्त गरेका थिए । 

फाइनलसम्म पुग्न मनाङले विभागीय टीम त्रिभुवन आर्मी र आयोजकलाई समान १–० ले हराएको थियो । थ्रीस्टारले एपीएफलाई २–० र नेपाल पुलिसलाई ट्राइबेकरमा ३–४ गोल अन्तरले हराएको थियो । माईभ्याली गोल्डकपमा दोश्रो पटक सहभागिता जनाएको थ्रीस्टार पहिलो संस्करणमा विभागीय टीम आर्मीसँग सडनडेथमा ६–७ गोल अन्तरले पराजित बन्दै उपविजेता बनेको थियो । 

जीतसँगै थ्रीस्टारले नगद ६ लाख ६६ हजार ६ सय ६७ रुपैयाँ र ट्रफी पायो । मनाङले भने ४ लाख रुपैयाँमा चित्त बुझाउनुपर्यो । फाइनलको ‘म्यान अफ द म्याच’ उपविजेता मनाङ मस्र्याङ्दीका हेमन गुरुङ घोषित हुँदै नगद १० हजार र चाँदीको मेडल प्राप्त गरे ।

प्रतियोगिताको उत्कृष्ठ खेलाडी उपविजेता मनाङका बिराज महर्जन घोषित भए । उनले १५० सिसीको यमाहाको स्कुटर प्राप्त गरे । प्रतियोगिताको सर्वाधिक गोलकर्ता आयोजक मार्ईभ्यालीका मनीष थापा, नेपाल पुलिसका क्लबका रेजिन सुब्बा तथा एपीएफका युवराज खड्का र नवीन लामा घोषित भए । खेल अवधिभर २-२ गोल गरेका उनीहरुले जनही ७ हजार रुपैयाँ प्राप्त गरे ।   

प्रतियोगिताको उत्कृष्ट गोलरक्षक विजेता थ्रीस्टार क्लबका एलन न्यौपाने घोषित भए । उनले नगद १५ हजार रुपैयाँ प्राप्त गरे । उत्कृष्ट डिफेन्डर विजेता थ्रीस्टारका पिटर, उत्कृष्ठ मिडफिल्डर थ्रीस्टारकै सुनिल बल, उत्कृष्ट फर्वाड थ्रीस्टारकै विदेशी खेलाडी मार्टिन र उत्कृष्ट प्रशिक्षक थ्रीस्टारकै मेघराज केसी घोषित भए । उनीहरुले जनही नगद १५ हजार प्राप्त गरे । त्यसैगरी उदयीमान खेलाडि आयोजक मार्ईभ्यालीका दर्शन गुरुङ घोषित भए । उनले नगद २० हजार प्राप्त गरे । 

गत ६ वैशाखबाट सुरु भएको प्रतियोगितामा तीन विदेशीसहित नेपालका ‘ए’ डिभिजन क्लब र विभागीय गरी १२ टीमको सहभागिता थियो । 
मार्ईभ्याली फुटबलको आयोजनामा प्रतियोगितामा सञ्चालन गरिएको थियो । प्रतियोगिताको फाइनलको अवसर पारेर खेल सम्पन्न गर्न योगदान गर्ने व्यक्ति तथा संस्थाहरुलाई सम्मानसमेत गरिएको छ ।