सिन्डिकेट नमान्ने र गाडी बन्द नगर्ने कबोल गर्दै छुटे व्यवसायी
वैशाख २३, २०७५ आइतबार १५:२०:०
सिन्धुली: सार्वजनिक यातायातमा सिन्डिकेट लगाएको आरोपमा पक्राउ परेका नेपाल यातायात व्यवसायी महासंका बस संयोजक कान्छामान बल आइतबार रिहा भएका छन् ।
सरकारले सिन्डिकेट खारेज गरेको विरोधमा यातायातका साधन बन्द गरेर शुक्रबार आन्दोलनमा उत्रेको भन्दै बललाई सिन्धुली प्रहरीले त्यही दिन पक्राउ गरेको थियो ।
बिपी यातायात सेवा समितिका अध्यक्ष समेत रहेका बलले सरकारको निर्णय मान्ने, आन्दोलनरत व्यवसायीसँग छलफल गरेर यातायात सञ्चालन गर्ने, जिल्लामा यातायात बन्द नगर्ने लगायतका विषयमा लिखित प्रतिबद्धता जनाएपछि रिहा भएका हुन् ।
उनलाई यातायात व्यवसायी र सञ्चारकर्मीहरूको रोहबरमा आइतबार रिहा गरिएको सिन्धुलीका प्रहरी प्रमुख टीकाबहादुर केसीले जानकारी दिए ।
'सरकारको निर्णय कार्यान्वयन गर्न सघाउने प्रतिबद्धतापछि बललाई छाडिएको हो', उनले भने, । यातायातमा केही व्यवासायीहरूले मनोमानी गर्दै एकाधिकार जमाउन खोजेको भन्दै सरकारले देशभरका यातायात सेवा समिति खारेज गरेको थियो ।
त्यसकै विरोधमा आन्दोलनरत व्यवसायीहरूलाई पक्राउ गरी कारबाही थालेको थियो । सरकारले आफुहरूको मागलाई पनि सम्बोधन गरी, व्यवसायीका समस्या र सुरक्षाको प्रत्याभुती गरे सरकारको निर्णय मान्न र यात्रुमैत्री व्यवसाय गर्न तयार रहेको बलले प्रहरी कार्यालयमा पत्रकारसँगको कुराकानीमा बताए ।
प्रतिक्रिया दिनुहोस !
