रामेछापः मंगलबार विहानदेखि हराइरहेका उमाकुण्ड गाउँपालिका–५ प्रीतीका वडाअध्यक्ष कुविर खत्री मृत अवस्थामा भेटिएका छन् ।
वेपत्ता खत्रीको बुधवार विहान वडा नम्बर ५ प्रीतीकै बसेरी चिलाउने भन्ने ठाउँमा शव भेटिएको उमाकुण्ड गाउँपालिकाका प्रमुख शेरबहादुर सुनुवारले जानकारी दिए । उनले लिखु खोलामा हाम फालेर आत्महत्या गरेको हुनसक्ने प्रहरीले आशंका गरेको छ ।
मृत भेटिएका वडाअध्यक्ष खत्री मंगलबार विहान ८ः३० बजे गाउँपालिका सदस्यलाई समेत बैठकमा जानु पर्छ भनी खबर गरेर घरबाट हिँडेका थिए । खत्रीको मोटरसाइकल, कोट, जुत्ता र डायरी मंगलबारै खोलाको किनारमा फेला परेको थियो ।
गाउँपालिकाका प्रवक्ता रुद्रमणि नेवारका अनुसार वडाअध्यक्ष खत्रीको मोटरसाइकल, कोट, जुत्ता र डायरी भेटिए भन्दा पाँच सय मिटर तल शव भेटिएको हो ।
मंगलबारको गाउँ कार्यपालिकाको बैठकमा अबेरसम्म नआएपछि वडाअध्यक्ष खत्रीलाई सम्पर्क गर्दा फोन उठेको थिएन । घरपरिवारमा फोन गर्दा विहानै हिँडेको जानकारी आएपछि गाउँपालिका, प्रहरी र स्थानीयहरुले उनको खोजीमा लागेका थिए ।
वडाअध्यक्ष खत्रीको शव अप्ठ्यारो ठाउँमा रहेकाले निकाल्न समय लाग्ने गाउँपालिकाका प्रमुख शेरबहादुर सुनुवारले बताए । मृत भेटिएका खत्री नेकपा एमालेबाट निर्वाचित वडाअध्यक्ष हुन् ।
प्रतिक्रिया दिनुहोस !
