दमक : मनाङ मस्र्याङदी क्लब झापाको दमकमा जारी प्रथम दमक गोल्डकप फुटबल प्रतियोगिताको फाइनलमा प्रवेश गरेको छ । बुधबार भएको अन्तिम सेमिफाइनलमा त्रिभुवन आर्मी क्लबलाई टाइब्रेकरमा पराजित गर्दै मनाङले फाइनल यात्रा तय गरेको हो ।
मनाङले टाइब्रेकरमा आर्मीलाई ५-४ गोलले पराजित ग¥यो । मनाङले उपाधिका लागि नेपाल पुलिस क्लबसँग प्रतिस्पर्धा गर्ने छ । निर्धारित समयमा दुवै टोलीबाट १-१ गोलको बराबरी भएपछि खेलको निर्णय टाइब्रेकरबाट लिइएको थियो ।
पेनाल्टी सुटआउटमा आर्मीका दीपक गुरुङको प्रहारलाई मनाङका गोलकिपर विशाल श्रेष्ठले रोकेपछि आर्मीको उपाधि जित्ने आशा तुषारापात भएको हो । आर्मीका लागि भरत खवास, सन्तोष तामाङ, जर्जप्रिन्स कार्की र विवेक बस्नेतले गोल गरे । मनाङका कमल श्रेष्ठ, विमल बस्नेत, सुजल श्रेष्ठ, हेमन गुरुङ र अञ्जन विष्टले गोल गरे । खेलको ३०औं मिनेटमा पाएको कर्नर किकलाई सदुपयोग गर्दै टंक बस्नेतले आर्मीका लागि गोलको खाता खोलेका थिए । पहिलो हाफमा खुलेर खेल्न नसकेको मनाङ दोस्रो हाफमा भने आक्रामक बनेको थियो । दोस्रो हाफको दोस्रो मिनेटमा नै दीपक राईले गोल गर्दै खेल बराबरीमा ल्याएका थिए । आर्मीले धेरै अवसर पाए पनि सदुपयोग गर्न सकेन ।
खेलको १०औं मिनेटमा आर्मीका कप्तान भरत खवासको क्रस प्रहारलाई मनाङका विदेशी डिफेन्डर फ्लोरेन्टले हेडमार्फत क्लियर गरेका थिए । मनाङका विमल रानाको क्रस पासलाई सुजल श्रेष्ठले गरेको प्रहार गोलपोस्ट नजिकैबाट बाहिरिएको थियो । ५३ औं मिनटमा आर्मीका गोलकिपर विकेश कुथुको हातबाट फुत्किएको बललाई मनाङका अञ्जन विष्टले गरेको प्रहार क्रसबार नजिकैबाट बाहिरिएको थियो । ६१औं मिनेटमा आर्मीका नवयुग श्रेष्ठले पाएको अवसरलाई खेर फाले ।
पहिलो हाफमा दबाबमा परेको मनाङ दोस्रो हाफमा लयमा फर्किएको थियो । बुधबारको खेलको म्यान अफ दी म्याच मनाङका गोलकिपर विशाल श्रेष्ठ घोषित भए । उनले नगद ११ हजार रुपैयाँ प्राप्त गरे । प्रतियोगिताको फाइनल खेल शुक्रबार हुनेछ । अर्को विभागीय टोली एपीएफलाई हराउँदै पुलिसले फाइनल यात्रा तय गरेको हो । मनाङले भने यसअघि सरस्वती क्लबलाई पराजित गरेको थियो । प्रतियोगिताको विजेताले नगद १३ लाख ११ हजार तथा उपविजेताले ६ लाख ११ हजार रुपैयाँ प्राप्त गर्ने छन् । प्रतियोगिता दमक नगरपालिकाले आयोजना गरेको हो । बैशाख १९ गतेदेखि सुरु भएको प्रतियोगितामा ए डिभिजनसहित १० टोलीको सहभागिता रहेको छ ।
प्रतिक्रिया दिनुहोस !
