मुक्तिनाथ सेताम्य, माइनस तापक्रममा मोदीको स्वागत ! (फोटो फिचर)
वैशाख २७, २०७५ बिहीबार १८:२:०
मुक्तिनाथः विहीबार बिहान ९ बजे मुक्तिनाथमा एक फिट हिउँ जमेको थियो । त्यतिबेला त्यहाँको तापक्रम माइनस २ डिग्री थियो ।
बिहानैबाट हेलिप्याड र स्वागत गेट निर्माण गर्ने भनिए पनि दिउँसो १ बजे मात्रै काम सुरु हुन सक्यो । बेमौसमी हिमपातका कारण चिसोकाबीच भारतीय प्रधानमन्त्री नरेन्द्र मोदीको मुक्तिनाथ भ्रमणको स्वागतको तयारी अघि बढेको छ ।
मुक्तिनाथ मन्दिरको प्रवेशद्वारसम्म ६ वटा हेलिप्याड र ६ वटा स्वागत गेट निर्माण गर्ने तयारी भएपनि हिमपात र चिसोले सोचे जस्तो काम हुन नसकेको बाह्रगाउँमुक्तिक्षेत्र गाउँपालिकाका प्रमुख प्रशासकीय अधिकृत दीपक रेग्मीले जानकारी दिए ।
गाउँपालिकाको अगुवाईमा स्थानीय भौतिक संरचना निर्माण जनप्रिय युवा क्लबले गरिरहेको छ । ‘बिहान ११ बजेसम्म यहाँ मान्छे हिड्डुल गर्न सक्ने अवस्था थिएन्, त्यसैले गेट निर्माणको काम निकै ढिला भयो’, उनले भने, ‘मौसमले साथ दिइरहेको छैन ।’
बिजुली र फोन ठप्प
हेलिप्याडको रेखांकन र स्थान छनौटका लागि आएका सुरक्षा निकायको हेलिकोप्टरहरु अवतरण गर्न नसकेर पटक–पटक जोमसोम फर्केका थिए । हिमपातका कारण मुक्तिनाथ र कागबेनी क्षेत्रका ६ वटा विजुलीका खम्बा ढलेपछि मुक्तिनाथमा विद्युत् र सञ्चार सम्पर्कबिच्छेदको अवस्था छ ।
इन्टरनेट र सञ्चार सम्पर्क नहुँदा जिल्ला, प्रदेश र केन्द्रसँग समन्वय गर्न समस्या उत्पन्न भइरहेको छ । प्रमुख जिल्ला अधिकारी शिशिर पौडेल र जिल्लास्तरीय स्वागत समितिका संयोजक एवम् जिल्ला समन्वय समितिकी प्रमुख छिरिङ ल्यामो गुरुङको निर्देशनमा ढलेको खम्बाहरु जडान भएपनि सञ्चार सम्पर्क भरपर्दो छैन ।
मुक्तिनाथमा पर्यटन व्यवसायी सुरज गुरुङका अनुसार वैशाख अन्तिम साता हिमपात भएको यो नै पहिलो पटक हो । ‘मैले थाहा पाएसम्म र जानकारी भएसम्म यस्तो कहिल्यै भएको थिएन्, यति बाक्लो हिउँ त पुस÷माघ पनि भएको थिएन’, उनले भने, ‘हिउँले विद्युत र सञ्चारका तारहरु अबरुद्ध बनायो, जसले यहाँको तयारीलाई अस्तव्यस्त बनाइदिएको छ ।’
हिमपातले मुक्तिनाथसँगै झारकोट र खिँगा गाउँ सेताम्मे भएको थियो । जिसस प्रमुख गुरुङले प्रतिकुल मौसमका बीच स्वागतका लागि आश्यक तयारी गर्नुको विकल्प नभएको बताइन् । ‘सबै खाले विकल्पहरु प्रयोग गर्दै हामीले गेट र हेलिप्याडहरु बनाउनेछौँ, हेलिप्याडका लागि सुरक्षा निकायहरु खटेका छन् भने स्वागत गेटका लागि स्थानीय युवाहरु’, उनले भनिन् ।
वैशाख २९ गते बिहान हेलिकोप्टरबाट मुक्तिनाथ प्रवेशद्धार नजिकै निर्माण गरिने हेलिप्याडमा अवतरण गरेपछि मोदी पैदल मुक्तिनाथ मन्दिर पुग्नेछन् । त्यहाँ उनलाई मन्दिरका बटुकहरु सम्मान दिनेछ । इतिहासमै पहिलोपटक मोदीलाई मुल मण्डपमै राखेर पुजाअर्चनाको सुविधा दिइनेछ ।
भरपर्दो सुरक्षा
प्रमुख जिल्ला अधिकारी पौडेलले सुरक्षा निकायसँगको समन्वयमा भरपर्दो सुरक्षा व्यवस्था मिलाइएको जानकारी दिए । ‘नेपाल र भारतका सुरक्षा अधिकारीसँगको समन्वयमा चुस्त सुरक्षा प्रबन्ध मिलाएका छौँ, उहाँलाई सुरक्षित रुपमा मुक्तिनाथ दर्जन र पुजनको व्यवस्था मिलाउनेछौँ’, उनले भने ।
बन्द छोटियो
प्रशासनले वैशाख २४ गते सूचना जारी गर्दै २८ र २९ गते बेनी–जोमसोम सडक, मुस्ताङ र मनाङको सीमाना थोराङला पास बन्द गर्ने बताइए पनि सर्वत्र विरोध भएपछि २८ गते साँझ ४ बजेदेखि मुक्तिनाथ क्षेत्रमा मात्रै बन्द गर्ने निर्णय गरेको छ ।
‘२९ गते उहाँले पुजापाठ गर्ने समयसम्म हामीले प्रवेश निषेध गरेका छौँ, अरु समय खुल्ला सबै खुल्ला हुनेछ’, उनले भने । मोदीको भ्रमणलाई मध्यनजर गर्दै म्याग्दीको सीमाना घासामा सुरक्षा व्यवस्था कडा बनाइएको छ ।
निगरानी बढाइयो
मार्फा, जोमसोम, कागबेनी र मुक्तिनाथ क्षेत्रका होटलहरुमा व्यापक निगरानी बढाइएको छ । चोक–चोकमा सुरक्षाकर्मी तैनाथी गरिएको छ । मोदीको विशेष पुजाका लागि मुक्तिनाथ मन्दिरको मर्मत र रंगरोगन, अति विशिष्ट कक्ष तयार, १०८ धारा, हेलिप्याड निर्माण र शौचालयको सरसफाई गरिएको छ ।
मुक्तिनाथका मुख्य पुजारी कृष्ण् प्रसाद सुवेदीले धार्मिक पर्यटन प्रर्बद्धन हुने भएकाले मोदीलाई मुल मण्डपमै पुजा अर्चनाको व्यवस्था गरिएको जानकारी दिए ।
‘अहिलेसम्म हामीले कसैलाई पनि त्यस्तो सुविधा दिएका थिएनौँ, उहाँ मुक्तिनाथ दर्शन गर्ने अहिलेसम्मकै उच्च विदेशी पाहुना समेत हुनुहुन्छ’, उनले भने ।
मोदीकै भ्रमणका लागि मिनी आईसीयु कक्ष पनि स्थापना गरिएको छ । त्यहाँ नेपाली र भारतीय विशेषज्ञ स्वास्थ्यकर्मी रहनेछन् । २८ गते मुक्तिनाथका होटलहरु बन्द गरिनेछ ।
प्रतिक्रिया दिनुहोस !
