मनाङलाई हराउँदै पुलिस दमक गोल्डकप च्याम्पियन, नगद १३ लाख जित्यो
दमकः प्रथम दमक गोल्डकप फुटबल प्रतियागिताको उपाधि विभागीय टोली नेपाल पुलिस क्लबले जितेको छ । शुक्रबार भएको फाइनल खेलमा बलियो प्रतिस्पर्धी मनाङ मस्र्याङदी क्लबलाई १–० गोल अन्तरले पराजित गर्दै पुलिसले उपाधि जितेको हो । उपाधिसँगै पुलिसले नगद १३ लाख ११ हजार रुपैया प्राप्त गर्यो ।
अन्तिम समयमा मनाङ सम्हालिन नसक्दा उपविजेतामा सीमित भयो । उसले ६ लाख ११ हजार रुपैयाँमा चित्त बुझाउनु पर्यो । पहिलो हाफमा दुवै तर्फबाट कुनै गोल हुन सकेन ।
दोस्रो हाफको सुरुमै रेजिन सुब्बाले गरेको गोलले पुलिसलाई उपाधि दिलायो । खेलको सुरुवातदेखि नै पुलिस मनाङमाथि हाबी भएको थियो । खेल सुरु भएको दोस्रो मिनेटमा पुलिसका अभिषेक रिजालको हेड बल पोष्टको बायाँ बार छेउबाट बाहिरिएको थियो ।
त्यस्तै ११ औँ मिनेटमा पुलिसका सुमन लामाको फ्री–किक मनाङका डिफेन्डरले मुश्किलले बचाएका थिए । ३४ औं मिनेटमा पाएको कर्नर बललाई पुलिसका रेजिन सुब्बाले प्रहार गर्न सकेनन् ।
त्यस्तै दोस्रो हाफको २३ औ मिनेटमा भिक्टोरको पासमा वान भर्सेस वानको स्थितीमा रहेका मनाङका अन्जन बिष्ट गोल गर्न चुकेका थिए । जितपछि पुलिसका प्रशिक्षक थापाले सबैले उत्कृष्ट खेल प्रर्दशन गरेकोले जित सुनिश्चित भएको बताए ।
शुक्रबार भएको खेलको म्यान अफ द म्याच पुलिसका अभिषेक रिजाल भए । उनले नगद ११ हजार प्राप्त गरे । त्यस्तै प्रतियोगिताको बेस्ट डिफेण्डर बिजेता टिम पुलिसका सन्तोष हेमरन, बेस्ट स्ट्राइकर पुलिसका रेजिन सुब्बा, बेस्ट मिडफिल्डर उपविजेता मनाङका सुजल श्रेष्ठ र उत्कृष्ट प्रशिक्षकमा पुलिसका अनन्त थापा घोषित भए ।
उनीहरु सबैले जनही २५ हजारसँगै मेडल र प्रमाणपत्र प्राप्त गरे । त्यस्तै सर्वाधिक गोलकर्ताको पुरस्कार संयुक्त रुपमा तीन÷तीन गोल गरेका आर्मीका नवयुग श्रेष्ठ, मदन भण्डारी स्पोर्टस् एकेडेमीका विदेशी खेलाडी अलावाले र एपीएफका हरी कार्कीले प्राप्त गरे ।
उनीहरु तीनैजनालाई २५ हजार रुपैयाँ संयुक्त रुपमा प्रदान गरियो । सर्वोत्कृष्ट खेलाडी पुलिसका गोलकिपर किरण चेम्जोङ घोषित भए । उनले टिभिएस कम्पनीको अपाची १६० सिसिको मोटरसाइकल प्राप्त गरे ।
गोल्डकप बैशाख १९ गतेदेखि सुरु भएको थियो । दमक नगरपालिकाले आयोजना गरेको गोल्डकपमा आयोजकसहित १० टिमको सहभागिता रहेको प्रचारप्रसार संयोजक चन्द्र खत्रीले जानकारी दिए । उपाधि विजेता टिमलाई गोल्डकप समापन कार्यक्रमका प्रमुख अतिथि अखिल नेपाल फुटबल संघ (एन्फा) का नवनिर्वाचित अध्यक्ष कर्माछिरिङ शेर्पाले नगद, ट्रफी र प्रमाणपत्र वितरण गरे ।
प्रतिक्रिया दिनुहोस !
