काठमाडौं : आठजना गाइडले एकै साथ वसन्त ऋतुको पहिलो सगरमाथाको सफलतापूर्वक आरोहण गरेका छन् । आरोहीलाई चुचुरो पुर्याउन बाटो निर्माणमा खटिएका दक्ष गाइड पासाङ तेन्जिङ शेर्पा, पासदावा शेर्पा, लाक्पाडेन्डी शेर्पा, जेन्जेन लामा, सिद्धिबहादुर तामाङ, पेम्वाछिरी शेर्पा, तेन्जिङ ग्याल्जेन शेर्पा र डाटुक भोटेको समूहले सामूहिक रूपमा बाटो निर्माण गरी आइतबार अपराह्न ३:३० बजे चुचुरो चुमेको हो ।
हिमालयन गाइड नेपाल ट्रेकबाट खटिएका गाइडहरूले आइतबार हिलारी स्टेप भन्दा मुनीदेखि बाटो निर्माण गरी चुचुरो पुगेको कम्पनीका प्रमुख ईश्वरी पौडेलले जानकारी दिए । ‘यस वर्ष बाटो बनाउने जिम्मा हामीले पाएका छौं । आठ जना दक्ष गाइडहरूले दुई सातादेखि लगातार प्रयास गरी बाटो निर्माण गरी आइतबार अपराह्न सगरमाथाको सफल आरोहण गरेको स्यटलाइट फोनबाट खबर प्राप्त गरेका छौं’, पौडेलले भने ।
वसन्त ऋतुकै यो पहिलो आरोहण हो । यस वर्ष २० नेपालीसहित तीन सय ४६ जनाले सगरमाथाको आरोहणका लागि अनुमति लिएका छन् । केही दिन अघिसम्म मौसम खराब भए पनि आइतबार हावा कम चलेकाले मौसम राम्रो रहेको चुचुरो पुगेका संखुवासभाका आरोही गाइड जेनजेन लामाले कम्पनीलाई बताएका थिए ।
यस वर्ष होचा तथा अग्ला गरी २८ वटा हिमालमा एक सय चारवटा अरोहण दलका आठ सय ३८ जना आरोहीले सरकारसँग आरोहण अनुमति लिएका छन् ।
गत वर्षको वसन्त ऋतुमा चार सय ४५ जनाले सगरमाथाको आरोहण गरेका थिए । एक सय ९० जना विदेशी र दुई सय ५५ जना नेपालीले सफलतापूर्वक आरोहण गरेको पर्यटन विभागले जनाएको छ ।
यता सगरमाथा, ल्होत्से र नुप्से हिमाल आरोहणका लागि गएका आरोहीको सहयोगका लागि सरकारले खटाएको ५१ जना सम्पर्क अधिकृत आधारशिविर पुगेका छैनन् । आरोहीलाई सहयोगदेखि आवश्यक गैरकानुनी कामको रेखदेख गर्ने जिम्मा लिएर पुगेको सरकारी प्रतिनिधि नपुगेको भन्दै आरोहण दलले आपत्ति जनाएको छ ।
प्रतिक्रिया दिनुहोस !
