उदयपुर गोल्डकप: मोरङलाई घर फर्काउँदै थ्रीस्टार सेमिफाइनलमा
वैशाख ३१, २०७५ सोमबार २१:१३:०
गाईघाटः मोरङ–११ लाई घर फर्काउँदै ललितपुरको थ्रीस्टार क्लव ललितपुर उदयपुरमा जारी पाँचौ रमपम गोल्डकप फुटबल प्रतियोगिताको सेमिफाइनलमा प्रवेश गरेको छ ।
सोमबार भएको खेलमा मोरङ–११ लाई ४–१ गोलले पराजित गर्दै थ्रीस्टारले अन्तिम चारमा स्थान बनाएको हो । मोफसलमा यो सिजनमा ४ उपाधि जितिसकेको थ्रीस्टारको जितमा अजय मार्टिनले दुई, अनन्त तामाङ्ग र रुपेश केसीले एक–एक गोल गरे ।
थ्रीस्टारका मार्टिनले खेलको ३२ औ मिनटमा गोल गर्दै खाता खोले । १ गोलले अघि रहेको थ्रीस्टारका लागि दोस्रो गोल पुनः मार्टिनले ५८ औँ मिनट गरे । उनले रिबाउण्ड बलमा गोल गरेका थिए ।
मध्यान्तरपछि रुपेश केसीले ८५ औ मिनटमा र अनन्त तामाङ्गले ८७ औ मिनटमा लगातार दुई गोल गर्दै थ्रि स्टारले ठूलो गोल अन्तरको जित हात पार्न सफल भयो । मोरङ–११ को तर्फबाट खेलको ५२ औँ मिनटमा अफ्रिकन खेलाडी यमवालाले सान्त्वना गोल गरे ।
मोरङविरुद्ध थ्रीस्टारले सशक्त प्रदर्शन गरेको थियो । खेल अवधिभर थ्रीस्टार हावी भएको थियो । मोरङले केही अवसर सदुपयोग गर्न नसक्दा एक गोलमै चित्त बुझाउनु परेको थियो । २ जना अफ्रिकन खेलाडी लिएर मैदानमा उत्रिएको मोरङका लागि प्रतियोगिता निकै सकस रह्यो ।
तीन नाजेरियन खेलाडी लिएर मैदानमा उत्रिएको थ्रीस्टारीले अझ बढी गोल गर्ने अवसर गुमाएको थियो । मार्टिनका केही राम्रा प्रहारलाई मोरङको गोलरक्षकले विफल तुल्याएका थिए ।
प्रतियोगिताको म्यान अफ दि म्याच थ्रीस्टारका मार्टिन भए । उनलाई नगद ७ हजारसहित रौतामाई गाउँपालिकाका अध्यक्ष गजेन्द्रबहादुर खड्काले सम्मान गरे । मंगलबारको खेल दमक गोल्डकप विजेता विभागीय नेपाल प्रहरी र सुनसरी–११ बीच हुने प्रतियोगिता मुल आयोजक समितिका अध्यक्ष किरण राईले जानकारी दिए ।
प्रतिक्रिया दिनुहोस !
