काठमाडौँ : चर्चित हिमआरोही कामीरिता शेर्पाले २२ औं पटक सगरमाथा शिखर चुम्न सफल भएका छन् । योसँगै कामीरिताले २१ पटक सगरमाथा चढेको हिमआरोही आप्पा शेर्पाको विश्व कीर्तिमान पनि तोडेका छन् ।
चर्चित आरोही कामीसँगै अन्य सात नेपाली र सात विदेशी आरोहीको टोलीले पनि बुधबार बिहान ८ बजेर ३० मिनेटमा सगरमाथा चुचुरो चुमेको हो ।
सोलुखुम्बूको थानेमा घर भएका ४८ वर्षीय कामीले गत वर्ष आप्पा शेर्पाको कीर्तिमान बराबरी गर्न सफल भएका थिए । उनले यो सिजनमा आप्पाको कीर्तिमान पनि तोडेका हुन् ।
कामीरिताले २२ औँ पटक सगरमाथा चुमेको जानकारी प्राप्त भए पनि पुष्टि भइनसकेको पर्यटन विभागले जानकारी दिएको छ ।
कामीले यसअघि पहिलो पटक सन् १९९४ मा २२ वर्षमा सगरमाथा चढेका थिए । सगरमाथाको चुचुरोमा आप्पा र फुर्वा शेर्पाले २१ पटक पुगिसकेका थिए ।
प्रतिक्रिया दिनुहोस !
