प्रधानध्यापक पदबाट बर्खास्त
रामेछापः लिखु तामाकोसी गाउँपालिका धोबीस्थित झट्टेश्वर माध्यामिक विद्यालयका प्रधानध्यापक केबल बहादुर तिमिल्सिनाले आफ्नै विद्यार्थीलाई निर्घात कुटपिट गरी पिसाव खुवाएर यातना दिएको खुलासा भएको छ ।
पीडित विद्यार्थीहरुले प्रधानध्यापकको अत्याचार सहन नसकी शुत्रबार धोवी प्रहरी कार्यालयमा उजुरी दिएपछि यो कुरा बाहिर आएको हो । गाउँपालिका अध्यक्ष गोविन्द बहादुर खड्काका अनुसार प्रधानध्यापक तिमिल्सिनाले कक्षा ७ मा अध्ययनरत बुद्ध तामाङ र लाक्पा तामाङलाई निर्घात कुटपिट गरी पिसाव पिउन बाध्य बनाएका खुलेको हो ।
प्रधानध्यापक तिमिल्सिनाले आफूले उछृंखल गतिविधी गर्ने विद्यार्थीलाई सामान्य कारबाही गरेको दाबी गरेका छन् । उनका अनुसार जेठ १ गते कक्षा ७ मा अध्ययनरत विद्यार्थीहरु बुद्ध तामाङ, लाक्पा तामाङ र गणेश बुढाथोकी मिलेर आफ्नै साथी साङवीर तामाङलाई मिनरल वाटर बोतलमा पिसाव र थुक मिसाएर खुवाएको खुलेपछि उनीहरुलाई पनि त्यही पानी पिउन दिएको बताए ।
पिसाव पिउन नमानेपछि पाइपको टुक्राले सामान्य हिर्काएको उनले स्वीकारे गरे । कारबाहीका क्रममा बोतलको पानी बुद्ध र लाक्पाले पिए पनि गणेशले पिउन नमानेपछि पिसाव नै भएको विद्यार्थीले स्वीकारेको उनले बताए ।
यस्तै प्रधानध्यापक तिमिल्सिनाले अर्का कक्षा ९ मा अध्ययनरत ममिता तामाङलाई जेठ २ गते आफ्नै साथीसँग झगडा गरेको भन्दै निर्घात कुटपिट गरेको खसलेको छ ।
विद्यार्थी ममिता गाँजा खाएर विद्यालय आईसाथीसँग झगडा गर्ने गरेको भन्दै कपालमा समातेर गालामा पाँच चड्कन हानेको स्वीकार गरे ।
यता विद्यालय व्यवस्थापन समितिले शुक्रबार छलफलको लागि तत्काल बैठक डाकेको थियो ।
प्रधानध्यापक बैठकमा नआएपछि बहुमतको आधारमा विद्यालय शिक्षकहरुको सहभागितामै प्रधानध्यापक पदबाट हटाइएको गाउँपालिका अध्यक्ष गोबिन्दबहादुर खड्काले जानकारी दिए । उनका अनुसार अब प्रहरीमा संयुक्त उजुरी दिई कारबाहीको सिफारिस गरिने उनले बताए ।
प्रधानध्यापक तिमिल्सिनाले आफुलाई विद्यालय ब्यवस्थापन समितिको बैठकबारेमा केही थाहा नभएको बताउँदै गाउँपालिका अध्यक्ष र वडाअध्यक्षसँग राम्रो सम्बन्ध नरहेकै कारण घटनालाई तोडमोड गरेर हटाउन खोजेको आरोप लगाए ।
प्रधानध्यापकबाट हटाउनकै लागि गाउँपालिका र वडा कार्यालयबाट यत्रो खेल खेलेर बस्न आवश्यक नरहेको पनि उनले जिकिर गरे ।
प्रतिक्रिया दिनुहोस !
