तौलिहवाः अज्ञात समूहले कपिलवस्तुमा एक जेसीबीमा आगजनी गरेको छ । जिल्लाको विजयनगर गाउँपालिका–१, जवाबैराठमा काठ लोड गर्दै गरेको रा १ क ५६९ नम्बरको जेसीबीमा १५–१६ जनाको अपरिचित समूहले आगो लगाएको हो । आगजनीबाट जेसीबी पूर्ण रुपमा ध्वस्त भएको छ ।
गौतम बुद्ध साझेदारी वन उपभोक्ता समूहको काठ ठेकेदार पक्षले जेसीबी प्रयोग गरी ट्रयाक्टरमा लोड गर्ने बेला अज्ञात समूहले आगो लगाएको इलाका प्रहरी कार्यालय गणेशपुरका प्रहरी निरीक्षक खिमबहादुर घर्तीमगरले जानकारी दिए ।
जेसीबीमा आगजनी गरेको खबर पाएलगत्तै प्रहरी निरीक्षक घर्तीमगरसहितको टोली घटनास्थल पुगेको थियो । त्यसैगरी घटनास्थलमा इलाका प्रहरी कार्यालय कृष्णनगरका प्रहरी निरीक्षक र इलाका प्रहरी कार्यालय बहादुरगञ्जका प्रहरी नायब निरीक्षकको टोली समेत पुगेको बताइएको छ ।
जेसीबी दाङको शान्तिनगर–१ का घनश्याम बुढाको रहेको बताइएको छ । घटनास्थल जिल्लाकै सबैभन्दा सुदूर पश्चिम जवाबैराठमा पर्छ ।
प्रतिक्रिया दिनुहोस !
