काठमाडौं ः विश्वको तेस्रो अग्लो शिखर कञ्चनजंघा हिमाल (८५८६)मा चार वर्षपछि फेरि आरोहण सुरु भएको छ । बिहीबार दुई नेपाली र तीन रसियन आरोहीले कञ्चनजंघाको आरोहण गरका हुन् । चार वर्षसम्म आरोहण हुन नसकेको कञ्चनजंघा हिमालमा यस वर्ष संखुवासभाका लाक्पा शेर्पा, पेमा छिरिङ शेर्पा, अस्ट्रेलियाका कृस बर्के, जर्मनीका हर्वेट र रसियाका सेरर्जेले आरोहण गरेको सेभेन समिट ट्रेकिङ एजेन्सीका प्रमुख मिङ्मा शेर्पाले बताए । पाँचै आरोही बुधबार साँझ ५ बजे चुचुरोमा पुगेको उनको भनाइ छ ।
यो वसन्त ऋतुका लागि पाँच आरोहण दलका ४४ आरोहीले पर्यटन विभागसँग कञ्चनजंघा आरोहणको अनुमति लिएका छन् । विभागमार्फत सरकारी प्रतिनिधिका रूपमा खटिएका सम्पर्क अधिकृत सन्तोष मोक्तानले भने आरोहणबारे आफूलाई कुनै जानकारी नभएको बताए । काठमाडौंमै रहेका मोक्तानले आरोहण भयो भन्ने सुनेको तर पूर्ण जानकारी नपाएको बताए । प्राविधिक कठिनाइले गर्दा कम आरोहण हुने गरेको यो हिमालमा हालसम्म तीन सय ४४ जनाले मात्र आरोहण गरेका छन् ।
आरोहणका क्रममा सन् २०१३ र १४ मा लगातार दुर्घटना भएको थियो । सन् २०१३ र १४ मा कञ्चनजंघा आरोहण गरी फर्कने क्रममा आठजनाले ज्यान गुमाएका थिए । दुर्घटनाकै कारण यस क्षेत्रका कन्चनजंघा, यालुङ काङ (८५०५ मिटर), कञ्चनजंघा साउथ (८४७६ मिटर), कञ्चनजंघा सेन्ट्रल (८४७३ मिटर, र यालुङ काङ वेस्ट (८०७७ मिटर)को आरोहण चार वर्षयता प्रभावित छ ।
प्रतिक्रिया दिनुहोस !
