दमक ः झापाको दमक वडा नं. ७ का वडाध्यक्षको घरलाई लक्षित गरी बम बिस्फोट भएको छ । भीम पौड्यालको घरमा आइतबार राति बम बिस्फोट भएको हो । घरको च्यानगेटमा बम बिस्फोट भएको प्रहरीले जनाएको छ ।
बम बिस्फोट कसले र किन गरायो भन्ने अझै खुल्न सकेको छैन । घटनाका बिषयमा अनुसन्धान भइरहेको इलाका प्रहरी कार्यालय दमकका प्रहरी नायव उपरिक्षक दिपक गिरिले बताए।
बम बिस्फोटमा परेर दुई जना गम्भीर घाइते भएका छन् । घाइते हुनेमा श्यामकुमारी राई र तिलोचन पोखरेल रहेका छन् । उनीहरु दुबै जना श्रीमान् श्रीमती रहेको प्रहरीले जनाएको छ । राइ र पोखरेलको शरिरमा बिस्फोटको छर्रा लागेको छ ।
उनीहरु बेलुका दाजुको घरमा खाना खाएर फर्किदै गरेका थिए । उनिहरुको दुबै जनाको दमक स्थित लाइफलाइन अस्पतालमा उपचार भइरहेको छ । राइ लाइफ लाइन अस्पतालमा काम गर्छिन्।
बिस्फोटको घटनालाई केही दिन अघि बल प्रयोग गरेर संरचना हटाउन नगरपालिकाले डोजर लगाएको घटनासँग जोडिएर हेरिएको छ । केही दिनबाट दमक–७ स्थित बजार क्षेत्रमा रहेका नगरपालिकाको ११ कठ्ठा जमिनमा निर्माण गरिएका संरचनाहरु बलप्रयोग गरी हटाउन सुरु गरेपछि त्यहाँ तनाव बन्दै गएको थियो । यहीँ कारण घटना भएको हो भन्ने पुष्टि नभए पनि यसका बिषयमा अनुमान गर्न सकिने गिरिले बताए।
प्रतिक्रिया दिनुहोस !
