जनकपुरधाम : प्रदेश-२ मा खर्चको विषय लिएर सत्तारुढ दलहरुबीच नै अहिले विवाद चुलिएको छ । भारतीय प्रधानमन्त्री नरेन्द्र मोदीको भ्रमणमा भएको खर्चको बिषय लिएर विवाद चुलिएको हो ।
मोदी भ्रमणको समिक्षा गर्न बसेको बैठकमा सांसद डिम्पल झाले खर्चको विवरण मागेपछि विवाद सुरु भएको स्रोतको भनाइ छ । उनले खर्चको विवरण माग्दा कृषि भूमि व्यवस्था तथा सहकारी राज्यमन्त्री योगेन्द्र राय यादव र राजपा प्रदेशसभा सदस्य झाबीच विवाद भएको बैठकमा सहभागी एक नेताको भनाई छ ।
सवारी व्यवस्थापनदेखि लिएर अन्य व्यवस्थापनमा अनियमित्ता गरिएको भन्दै सांसद झाले बैठकमा बिरोध गरेपछि विवाद सतहमा देखिएको छ । कुनैपनि जिल्लामा आवश्यकता अनुसार सवारीसाधन नगएको समिक्षा बैठकमा उनले बताइएकी थिइन । तरपनि बिभिन्न व्यवस्थापनको नाममा राज्यको ढुकुटी सिँध्याउने काम मात्र भइरहेको बैठकमार्फत उनले गुनासो जाहेर गरेकी छन् । तर यो विषयमा प्रतिक्रिया लिन खोज्दा सांसद झाले प्रतिक्रिया दिन चाँहिनन् ।
समिक्षा बैठकमा खर्च विवरण माग्दा राजपा सांसद झामाथि दुव्र्यहारको विषय लिएर अहिले फोरम-राजपाको सम्बन्ध चिसिएको छ । दुव्र्यहार गर्ने सांसदले माफी नमागे सरकारबाट आफ्नो समर्थन फिर्ता लिन समेत राजपा संसदीय दलले निर्णय गरेको राजपा महामन्त्री मनिष सुमनले जनाए । उनका अनुसार गएको ४ जेठमा भएको प्रदेश-२ को संसदीय दलको बैठकमा यस्तो निर्णय गरिएको छ ।
कहाँ-कति खर्च?
मोदीको भ्रमणलाई सफल बनाउनको लागि काम बाँडफाड गरेर मुलसमितिसहित बिभिन्न ७ वटा उपसमितिहरु बनाइएको थियो । मुल समारोह समिति,मंच वयवस्थापन उपसमिति,सरसफाई तथा स्वागतद्वार उपसमिति,प्रचार-प्रसार उपसमिति,शान्ति सुरक्षा उपसमिति,जन परिचालन उपसमिति र आर्थिक व्यवस्थापन उपसमितिगरी साँतवटा समिति÷उपसमितिहरु बनाइएको थियो । प्रत्येक समिति÷उपसमितिहले आफ्नो जिम्मेवारी अनुसार छुट्टाछुट्टै खर्च गरेको मुख्यमन्त्री तथा मन्त्रिपरिषदको कार्यालयले जनाएको छ ।
भ्रमणमा जनपरिचालन समितिको संयोजक कृषि मन्त्री शैलेन्द्र साहका अनुसार २८ बैशाखमा भएको मोदी भ्रमणमा २ सय ३० बस परिचालन गरिएको जनाए । उनका अनुसार धनुषामा ६०,महोतरीमा ७०,सर्लाहीमा ४०,रौतहटमामा ४०,पर्सामा २० गरी ८ वटै जिल्लामा आवश्यकता अनुसार बस परिचालन गरिएको छ । कृषिमन्त्री साहले रौतहटमा ४० वटा बस परिचालन गरिएको भनेपछि सांसद झाले यो गलत रहेको भन्दै आक्रोसित भएकी थिइन् । उनका अनुसार रौतहटमा १० वटा बसमात्र परिचालन गरिएको थियो । तर बढी बस पठाइएको भनेर रकम अनियमित्ता गर्न लागिएको सांसद झाले बैठकमा उठान गरेको स्रोतको भनाई छ ।
कृषिमन्त्री साहका अनुसार प्रत्येक बसमा ५ हजारको दरले खाजा व्यवस्थापन पनि गरिएको थियो । अर्थात २ सय ३० वटा बसमा साढे ११ लाखको खाजाको व्यवस्था गरिएको थियो । कृषिमन्त्री साहले बसमा खाजाको व्यवसथा गरिएको दाबी गरेपनि बसमा आएकाहरुले भने आफूले खाजा नपाएको बताएका छन् । बीरगन्जबाट आएका खुुुर्सेद आलमले आफूहरु बीरगन्जबाट भोकै जनकपुर आएको बताए । कतैबाट पनि बसमा खाजाको नपाएको उनको भनाई छ । उनले भने,‘कार्यक्रम स्थलमै पिउने पानीको समेत व्यवस्था गर्न नस्कनेले कसरी बसमा खाजाको व्यवस्था गर्ला ? ’ बस कति भाँडामा रिजर्भ गरिएको भन्ने सवालमा मन्त्री साहले रकम खुलाउन आनाकानी गरे ।
त्यस्तै सामाजिक विकास मन्त्री रामनरेश रायले प्रचार-प्रसारमा ५० लाख भन्दा बढी खर्च भएको बताए । उनका अनुसार प्रत्येक जिल्लाको रेडियो,टिभी,पत्रपत्रिका सुचना प्रकाशन÷प्रशासरण गर्न दिइएको थियो । जसमा ५० लाखभन्दा बढी खर्च भएको उनको दाबी छ । त्यस्तै मञ्च व्यवसथापनमा १ करोड ६७ लाख खर्च र पेन्टिङमा २० लाखको हाराहरीमा खर्च भएको स्रोतको भनाई छ ।
मोदीको भ्रमणको व्यवस्थापनमा ७ करोड भन्दा बढी खर्च भएपनि मुख्यमन्त्रीको कार्यालयबाट भने औपचारिक घोषणा गरिएको छैन् । मुख्यमन्त्रीको कार्यालयका अनुसार भ्रमणमा प्रदेश सरकार र जनकपुर उपमहानगरपालकाले छुट्टाछुट्टै खर्च गरेको छ,त्यही भएर खर्च विवरण आउन सकेको छैन् ।
खर्चको विषय लिएर अहिले राजपा-फोरम गठबन्धन धरमराउन थालेको छ । राजपा संसदीयदलले गरेको निर्णयमा सहमति नभए प्रदेशसमा राजपासंगको गठबन्धनमा समस्या बढ्दै गएको राजपा नेताहरुको आंकलन छ ।
प्रतिक्रिया दिनुहोस !
