वडाध्यक्षले इन्जिनियर कुटेपछि राष्ट्रिय गौरवको योजना रोकियो
जेठ १०, २०७५ बिहीबार १२:५६:०
गाईघाटः नक्साकंन परिवर्तन गरेको भन्दै राष्ट्रिय गौरवको आयोजनाका इन्जिनियरमाथि बुधबार वडाध्यक्षले हातपात गरेपछि वैकल्पिक राजमार्ग निर्माण अवरुद्ध बनेको छ ।
धरान–चतरा–गाईघाट–कटारी–सिन्धुली हुँदैै हेटौँडा जोड्ने वैकल्पिक राजमार्ग अन्तर्गतको चौदण्डी नगरपालिका–६ सातधारेमा त्यही वडाका अध्यक्ष कमलध्वज राईले निर्माण कम्पनी लामा एण्ड शर्मा जेभिका ईन्जिनियर सन्दीप विष्ट र किशोर केसीमाथि निर्माणस्थलमै कुटपिट गरेका हुन् ।
आफ्ना कर्मचारीमाथि हातपात गरेको विरोधमा कम्पनीले असुरक्षाको कारण देखाउँदै निर्माण अवरुद्ध गरेको हो । नक्सा परिवर्तनको विवादले चार महिनादेखि उक्त सडकखण्डमा निर्माणको काम बन्द हँुदै आएकामा मंगलबारदेखि सुरु भएको थियो । तर उक्त घटनापछि बुधबारदेखि निर्माण ठप्प भएको छ ।
वडा अध्यक्ष राईको घर सडकमा पर्ने भएपछि एलाईमेन्ट (नक्साकंन) परिवर्तन गर्न दिँदै आएको दबाब नमान्दा उनले ती दुई कर्मचारीलाई कुटेका हुन् । एक सय ३४ किलोमिटर सडक निर्माण गर्न करिब ६ अर्बको ठेक्का पाएको लामा एण्ड शर्माले अहिलेसम्म पूर्वी खण्डमा ४० प्रतिशत काम सम्पन्न गरिसकेकोछ ।
चार महिनादेखि बाटोको काम अवरुद्ध हुँदा निर्धारित समयमा कामक सक्न ठेकेदार कम्पनीलाई समस्या हँुदै आएको निर्माण कम्पनीले जनाएको छ । चतरा– गाईघाट–कटारी– सिन्धुली, हेटौडा सडकको पूर्वीखण्डमा एलाइमेन्ट परिवर्तन गर्न प्राविधिक कठिनाई भएको पनि कम्पनीले बताउँदै आएको छ ।
विवादकै कारण सातधारे सडकखण्डमा चार महिनादेखि निर्माण अवरुद्ध छ । लामा एण्ड शर्मा जेभीका डेपुटी म्यानेजर सीताराम दाहालले असुरक्षित भएपछि निर्माण रोकेको बताए । ‘सहयोग गर्नुपर्ने जनप्रतिनिधिबाटै कर्मचारी कुटिएपछि कसरी काम गर्नु ?’ उनले भने ।
काम गर्ने वातावरण बनेमा पुःन सुचारु गरिने उनले बताए । जिल्ला प्रहरी कार्यालय उदयपुरका प्रमुख एसपी नवराज भट्टले घटनाबारे केही जानकारी नआएको बताए ।
प्रतिक्रिया दिनुहोस !
