'का‌ंग्रेस प्रतिपक्ष जस्तो हुनै सकेन, देउवाले झन् कम्जोर बनाए'

काठमाडौँ: नेपाली काग्रेसका केन्द्रीय सदस्य डा. शेखर कोइरालाले संघीय संसदमा आफ्नो पार्टीले सशक्त प्रतिपक्षको भूमिका निर्वाह गर्न नसकेको बताएका छन् । 

सरकारको नीति तथा कार्यक्रममा कांग्रेस मौन बसेपछि डा कोइरालाले गृहनगर विराटनगर आएर पछिल्लो अभिव्यक्ति दिएका हुन् । 

कोइरालाले सोमवार गुराँस पुस्तकालको ४८ औँ स्थापना दिवसमा भने, 'सरकारको नीति तथा कार्यक्रममा कांग्रेसले  समर्थन या विरोध गर्नुपर्थ्यो । मौन बस्नु दुर्भाग्य हो, यसले लोकतन्त्रलाई कमजोर बनाउँछ  । 

'कांग्रेस मौन बस्नुले विरोध वा समर्थन के गरेको बुझ्न सकिएन ?' कोइरालाले प्रश्न गरे । कांग्रेस सभापति शेरबहादुर देउवाको कार्यशैलीप्रति असन्तुष्ट देखिँदै आएका कोइरालाले पार्टीमा जस्तै संसदमा पनि कांग्रेसको उपस्थिति सभापतिले कमजोर बनाएको टिप्पणी गरे । 

'संसदमा प्रतिपक्ष कमजोर बन्दा लोकतन्त्र कमजोर बन्ने खतरा बढ्छ,'  कोइरालाले भने, 'कांग्रेसले प्रतिपक्ष जस्तो व्यवहार पनि देखाउन सकेन र काम पनि गर्न सकेन ।' 

संसदमा कांग्रेसको उपस्थिति न्यून भए पनि भूमिका शसक्त हुनुपर्ने उनको सुझाव थियो । प्रतिपक्षी सशक्त हुन नसक्दा सरकार तानाशाही बन्दै जाने उनको ठोकुवा छ । 

आफ्नो कार्यकाल अझै ३ वर्ष बाँकी रहेको सार्वजनिक अभिव्क्ति दिँदै हिँडेका सभापति देउवालाई कोइरालाले भने, 'विधान अनुसार निर्वाचित भएका सभापति विधान अनुसार नै १ वर्ष ९ महिनापछि स्वत: हटनु हुनेछ ।' 

प्रधानमन्त्री केपी शर्मा ओलीका पछिल्ला गतिविधिले लोकतन्त्र गुम्ने त होइन भन्ने काला बादलहरु देखा परिरहेको उनले बताए । 'कांग्रेस सशक्त प्रतिपक्षी बन्न सकेन भने प्राप्त उपल्ब्धि गुमेर जाने खतरा बढन सक्छ', कोइरालाले भने ।

गणतन्त्र दिवसको अवसरमा माओवादीका पूर्वसभासद् बालकृष्ण ढुंगेललाई आममाफी दिने ओली सरकारको रवैयाले प्राप्त लोकतन्त्र गुम्ने खतर बढेको उनको संकेत थियो । डा कोइरालाले न्यायपालिका दिनानुदिन कम्जोर हुदै गएको पनि बताए ।