बजेटबारे सुरेन्द्र पाण्डे: आयात निरुत्साहित हुँदा ब्यापार घाटा घट्छ

काठमाडौँ: पूर्व अर्थमन्त्री सुरेन्द्र पाण्डेले समाजिक सुरक्षालाई बजेटले प्राथमिकता दिएको बताए । खासगरी बढी गरिब तथा तल्लो वर्गका लागि बजेट केन्द्रित रहेको उनले बताए । 

एपीवान टेलिभिजनको एपी सेन्टरमा बोल्दै पाण्डेले सामाजिक सुरक्षामा जोड दिनु भनेको समाजवादतर्फ मुलुकलाई उन्मुख गराउने प्रयास रहेको बताए । 

'पहिलो आर्जन महत्वपूर्ण हो र यसलाई गोजीमा राख्ने होइन, बाँड्ने नै हो', उनले भने, 'सामाजिक सुरक्षाका लागि यही पैसा धेरै होइन, अब सबै मान्छे गरिबीबाट माथि चढ्ने पनि होइन, समाजिक सुरक्षाको पूर्णता पनि होइन । त्यो आफैँमा कम छ । स्रोतले धान्न सक्ने पैसा त होला ।'

पाण्डेले बजेटले आयातलाई निरुत्साहित गरेको पनि बताएका छन् । पाण्डेले प्रत्येक वर्ष २० प्रतिशतको दरले बढ्ने आयाततमा आधारित राजस्वको आकार यो वर्ष त्यो अनुपातमा नबढेको बताए । 'आयातमा आधारित भएको भए बजे १५/१६ अर्बमा पनि जान सकथ्यो', उनले भने, 'बजेटले आयातलाई निरुत्साहित गरेकाले ब्यापार घाटालाई पनि कम गराउने काम गर्छ ।' 

पाण्डेले निर्वाचन क्षेत्रका लागि छुट्याइएको बजेटको समर्थन गरे । उनले अन्य देशमा पनि यस्तो अभ्यास रहेको बताउँदै बजेटको सानो अंशलाई लिएर विवाद गर्नु जरुरी नरहेको बताए । 

'नीति तथा कार्यक्रमको विपरित जस्तो देखिए पनि म यसको पक्षमा छु', उनले भने, 'यो पिन नट हो, निर्वाचन क्षेत्रका लागि छुट्याइएको ४ करोड पनि कुल बजेटको धेरै सानो अंश हो ।'

पाण्डेले राष्ट्रिय गौरवका आयोजनालाई भने यो बजेटले सोचेजति प्राथमिकता दिन नसकेको बताए । 'राष्ट्रिय गौरवमा पोहोर उब्रिएको बजेटलाई पनि नयाँ बजेटमा थप्दै जानुपर्थ्यो', उनले भने, 'तर राष्ट्रिय गौरबका लागि यो पटक बजेटको अंश पनि सानो भयो ।'