सडकको धुलोले हैरान स्थानीयले गरे चक्काजाम
![सडकको धुलोले हैरान स्थानीयले गरे चक्काजाम](https://annapurnapost.prixacdn.net/media/albums/mahotari-road-bardibas_20180531025817_kjWxodXgaC.jpg)
महोत्तरीः सडकबाट उडेको धुलोले घरमा बसिनसक्नु भएपछि बर्दिबास नगरपालिका क्षेत्रका बासिन्दा बिहीबार बिहान बर्दिबास–औराही–जलेश्वर सडक खण्डमा चक्का जाम गरेका छन् ।
बिहीबार बिहानैदेखि सडकमा उत्रिएका बर्दिबास नपा–२ स्थित आर्दश टोल विकास संस्थाको अगुवाईमा चक्काजाम गरिएको हो ।
सडकको धुलोले हैरान बनाएको भन्दै स्थानीयबासीले नगरपालिका कायार्ललयमा एक महिना अघि नै नियन्त्रणका लागि ज्ञापनपत्र बुझाएका थिए ।
त्यसपछि बुधबार मात्रै सडक डिभिजन कार्यालय जनकपुरले छेउको माटो हालेर भत्किसकेको सडकको खाल्डाखुल्डी सम्याएपछि झन् धुलो उड्न थालेको थियो ।
आदर्श टोल विकास संस्थाका अध्यक्ष दीपेन्द्र झाका अनुसार धुलोले घरमा बसिनसक्नु भएपछि आन्दोलित हुनु परेको हो । उनले तुरुन्त पानी छर्किए धुलो कम गर्न तथा भत्केको सडकमा ग्राभेल गर्नु पनि माग गरेका छन् ।
वडा अध्यक्ष चोलाराज प्याकुरलेका अनुसार छलफल गरेर समस्या समाधानको कोशिश भइरहेको छ । चक्काजाम गरिएपछि बर्दिबास नगरपालिकाका मेयर बिदुर कुमार कार्की पनि पुगेका छन् । उनले जनताको माग अनुसार नै सडकलाई सम्म्याइएपछि धुलो उडेको बताउँदै यसको पनि समाधान खोजिने जानकारी दिए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)