विराटनगर : सुन तस्करीमा संलग्न भनिएका फरार अभियुक्त प्रहरी वरिष्ठ उपरीक्षक (एसएसपी) श्यामबहादुर खत्री बिहीबार बिहान जिल्ला अदालत मोरङमा उपस्थित भएका छन् ।
उनी बिहान १०ः४५ बजे अदालतमा हाजिर भएको निमित्त स्रेस्तेदार केदारप्रसाद गौतमले बताए । साढे ३३ किलो सुन तस्करी र मोरङ उर्लाबारीका सनम शाक्य हत्या प्रकरणमा फरार रहेका ३२ जना प्रतिवादीभित्र मुख्य अभियुक्त मध्येका एसएसपी खत्री पनि हुन् ।
अभियोग लागेपछि फरार बनेका एसएसपी खत्री अदालतमा उपस्थित भएका हुन् । अदालतले उपस्थितीकालागि फरार रहेका प्रतिवादीका नाममा ७० दिनको म्याद जारी गरिसकेको छ । यो काण्डमा २९ जना पुर्पक्षका लागि कारागार चलान भइसकेका छन् ।
एसएसपी खत्रीलाई पक्राउ गर्नका लागि इन्टरपोलमार्फत रेडकर्नर नोटिस जारी गरिएकोे थियो । प्रहरी र सुन काण्ड छानविन गर्नका लागि सरकारद्वारा गठित गृह मन्त्रालयका सहसचिव ईश्वरराज पौडेल नेतृत्वको समितिले खत्री लगायत फरार रहेकाहरुको खोजी गरिरहेको थियो ।
घटनाका मुख्य अभियुक्त गोरे भनिने चूडामणि उप्रेतीले खत्री पक्राउ परेपछि सुन तस्करीका बारेमा सबै कुरा खुल्ने बयान अदालतमा दिइसकेका छन् । पुर्पक्षका लागि कारागार चलान भइसकेका गोरेले खत्रीलाई पक्राउ गरेर बयान लिंदा सुनका मालिक देखिलिएर गिरोहसम्मका बारेमा जानकारी हुने बयान दिएका थिए ।
उनको बयानमा र अदालतमा विपक्षी बनाएर दायर गरिएको अभियोगमा खत्रीले तस्करीमा सहयोग गर्दा एक किलो सुन बराबर पचास हजार रुपैयाँ लिने गरेको दावी गरिएको छ ।
छानविन समितिका एक सदस्यका अनुसार सुन तस्करीमा संलग्नले प्रहरीसँग सेटिङ मिलाउने सबैजिम्मा एसएसपी खत्रीलाई दिएका थिए । यसैबीच अदालतमा हाजिर भएका खत्रीसँग जिल्ला न्यायाधीश नारायणप्रसाद शर्माको इजलासमा बयान लिन सुरु गरिएको निमित्त स्रेस्तेदार गौतमले बताए ।
खत्रीसँग बन्द इजलासमा बयान लिने काम सुरु गरिए पनि बयान लिन कति समय लाग्छ भन्ने बारेमा यकिन भइसकेको छैन । सुन तस्करी र सनम हत्या काण्डमा एसएसपी खत्रीसहित ६३ जनालाई प्रतिवादी बनाएर जिल्ला अदालत मोरङमा अपराधिक समुह स्थापना तथा संचालन गरी सुन चोरी पैठारी र चोरी निकासीको अवैध कारोवार, अपहरण तथा शरीर बन्धक र कर्तव्य ज्यान शीर्षकमा गत वैशाख १९ गते मुद्दा दर्ता गरिएको छ ।
प्रतिक्रिया दिनुहोस !
